Semeı qalasynda partııa tóraǵasy Erlan Qoshanov №35 baǵyttaǵy avtobýsqa otyryp, qala turǵyndarymen sóılesti. Turǵyndar turǵyn úı-kommýnaldyq sharýashylyq, jol jóndeý, áleýmettik nysandar salý sııaqty mańyzdy máselelerdi kóterdi.
Budan soń avtobýs parkinde ótken qoǵamdyq kólik salasynyń qyzmetkerlerimen kezdesýde jolaýshylar tasymaly máseleleri talqylandy.
«Qoǵamdyq kólik salasyn damytý – elimizdiń barlyq qalasynda ózekti. Lyq toly avtobýstar, olardy aıaldamada sarylyp uzaq kútý jáne tozyǵy jetken qoǵamdyq kólikter turǵyndardyń ómir súrý sapasyna keri áserin tıgizedi», dedi E.Qoshanov.
Partııalyqtar ár óńirde qoǵamdyq kólik tapshylyǵy men eskirgen avtoparkterge qatysty kúrdeli máseleni sheshýge júıeli túrde kúsh salatynyn jetkizdi. Úkimetpen birlesip, eski avtobýstardy qysqa merzimde jańa, otandyq kólikterge aýystyrýǵa múmkindik beretin sheshimder ázirlenedi.
Sondaı-aq shtab músheleri Iаdrolyq medısına jáne onkologııa ortalyǵynyń ujymymen kezdesip, saılaýaldy baǵdarlamanyń óńirlerdegi medısınalyq ınfraqurylymdy jaqsartýǵa baǵyttalǵan bólimi týraly aıtty. Partııa 2027 jylǵa deıin medısına qyzmetkerleriniń ortasha jalaqysyn kóterýge jáne dárigerler mártebesin zańnamalyq turǵydan bekitýge kúsh salady. Partııa Semeıde oblystyq 5 densaýlyq saqtaý nysanynyń salynýyn qamtamasyz etedi. Atap aıtqanda, 300 kelýshige arnalǵan 2 emhana, 400 tósektik kópbeıindi aýrýhana, emhanasy bar balalar aýrýhanasyn jáne Qan ortalyǵyn turǵyzýǵa atsalysady.
Bul kúni shtab músheleri Semeıdegi turǵyn úı-kommýnaldyq sharýashylyq salasynyń ókilderimen jáne qala belsendilerimen kommýnaldyq ınfraqurylymdy damytý jáne Múlik ıeleriniń birlestigi jobasyn engizýge qatysty máselelerdi talqylady.
