«Balalar men jasóspirimder týrızmin damytýǵa arnalǵan is-sharalar bıyl da sátimen jalǵasty. Máselen, jyldyq josparǵa sáıkes, «Taraz city bus» ekskýrsııalyq avtobýsynyń jumysy uıymdastyryldy. Joba 2022 jyldan bastap qolǵa alynǵan. Is-shara mamyr-maýsym, qyrkúıek-qazan aılarynda ótkizilip, oǵan myńnan asa oqýshy qatyssa, bıyl sáýir aıynan bastap, 6 aı boıy úzdiksiz júrgizildi. Nátıjesinde, 2 myńǵa jýyq oqýshy qamtyldy. Ekskýrsııa barysynda Taraz qalasynyń tarıhı-mádenı nysandary, atap aıtqanda, «Ejelgi Taraz» tarıhı-etnomádenı kesheni, «Tekturmas», «Aısha bıbi», «Qarahan», «Dáýitbek» keseneleri usynyldy. Sonymen qatar Taraz-Túrkistan baǵyty boıynsha qalaaralyq ekskýrsııalyq týr ótkizildi. Týr aıasynda Túrkistan oblysynyń «Aq meshit» týrıstik nysandary, «Domalaq ana», «Arystan bab», «Qoja Ahmet Iаsaýı» keseneleri, «Kerýen saraı» keshenderine balalardy arnaıy aparyp, aralattyq», deıdi «Taraz-týrızm» kommýnaldyq memlekettik mekemesiniń dırektory Mahanbet Rahymjanov.
Onyń aıtýynsha, óńir oqýshylarynyń tanymyn keńeıtýge arnalǵan «Jandy saıabaqtar» jobasy da 7-8-synyp oqýshylarynyń qyzyǵýshylyǵyn týdyryp otyr. Bul joba balalardyń tarıh-geografııa sekildi pánder boıynsha bilimin tereńdetýge baǵyttalǵan.
«Jalpy alǵanda ekskýrsııalyq baǵdarlama arqyly balalardyń yqylym zamannan kele jatqan baı tarıhqa degen qurmetin ańǵardyq. «Ejelgi Taraz» ashyq aspan astyndaǵy tarıhı-arheologııalyq murajaıy, «Qarahan», «Dáýitbek», «Aısha bıbi», «Babadja hatýn» jáne «Tekturmas» keseneleri sekildi tarıhı nysandarǵa saıahattaǵan balalardyń boıynan kóne shahardyń ótken-ketkenine degen qyzyǵýshylyq aıqyn baıqalyp turdy. Jalpy alǵanda bıyl 500-den asa oqýshy qaladaǵy tarıhı oryndarmen tanysty», deıdi ol.
Jambyl oblysy
