Seh meńgerýshisi Sulýshash Mateevanyń aıtýynsha, Qytaı, Almanııa, Reseı memleketterinen kásiporynǵa qajetti zamanaýı qurylǵylar der kezinde satyp alynǵan. Al aýyldyq azamattardyń tabys tabýyna yqpal etip otyrǵan seh bes jyl buryn ashylǵan. Sodan beri «Aq altyn»-nyń ónimine degen suranys eselep artpasa, esh tómendemegen. Bul qupııanyń basty sebebi seriktestik sapaǵa aıryqsha den qoıady. Sehte óndirilgen ónimge degen suranystyń artqany sebep bolsa kerek, kásiporyn basshylyǵy aıran, qaımaq, súzbe men irimshiktiń túr-túrin óndirip, tutynýshylaryna ótkerip júr.
Kásiporyn basshylary qajetti sútti mańaıdaǵy aýyldar turǵyndarynan alady. Aıtýlarynsha, turǵyndar sıyr sútiniń ár lıtrin 150 teńgeden ótkizedi eken.
Sútti jınap ákelý úshin arnaıy kólik qarastyrylǵan. Bir sózben aıtqanda, seh basshylary men aýyl turǵyndarynyń birlesip jumys isteýdiń arqasynda kásiporyn táýligine 2 tonnadan astam sút qabyldap, odan 700-800 tonna tabıǵı taza ónim ázirlep otyr. О́ndirilgen ónim sapasyn joǵaltpaýy úshin arnaıy úsh muzdatqysh satyp alǵan.
Seh meńgerýshisi keltirgen derekke sensek, kásiporyn óndirgen ónim negizinen otandyq kásipkerlerge ótkeriledi eken. Aıtýynsha, ónimdi tasymaldaýǵa arnalǵan arnaıy kólik apta saıyn Almaty qalasyna eki ret jol tartsa, Qyzylorda, Túrkistan, Shymkent qalalaryna bir márte qatynaıdy. О́ıtkeni osy qala turǵyndary tarapynan sehtyń ónimine degen suranys joǵary bolyp tur. Aldaǵy ýaqytta basqa da óńirlerge jetkizý joldary qarastyrylmaq.
«Bizdiń sehta qazirgi tańda jıyrma azamat turaqty jumyspen qamtylǵanyn aıta ketken jón. Qyzmetkerlerdiń ortasha eńbekaqysy shamamen 115 myń teńgeni quraıdy. Seh jumysynyń negizgi bóligin atqaratyn mamandar – 190 myń, qadaǵalaýshylar – 170 myń teńge kóleminde jalaqy alady. Aýyldyqtar úshin bul – jaman kórsetkish emes. Eń bastysy, olar óz jumysyna uqypty qaraıdy», deıdi «Aq altyn» sút ónimderin óndirý sehynyń meńgerýshisi Sulýshash Mateeva.
Jalpy «Aq altyn» sehynyń árbir qyzmetkeri ónimniń sapasyna aıryqsha nazar aýdarady. Sodan da bolsa kerek, kásiporyn ónimine degen suranys ilki sátke de báseńsigen emes. Al seh jumysy jyl ótken saıyn shıraı túsken.
«Kásiporyndaǵy qarbalasqa toly jumys bir sátke de toqtamaıdy. Áýelde qandaı bolsyn kásipti bastarda birshama qaımyǵasyń, qalaı bolady eken degen oı sanany torlaıdy. Nátıjesi úshin de aldyn ala bas aýyrtasyń. Áıtkenmen, jyldar boıy oıda júrgen jospar jetilgen kezde táýekelge bel baılaýǵa týra keldi. Qolǵa alǵan jumysymyz qazirgi kezde tıisti nátıjesin berip otyr.
Mundaǵy seh qyzmetkerleri mehanıkten bastap aıran quıýshyǵa deıin ónimniń sapaly bolyp shyqqanyn baqylaıdy. Onsyz is alǵa baspaıtyny álimsaqtan aıan ǵoı. Jyl ótken saıyn biz óndirgen ónimge degen suranystyń artyp kele jatqany kóńil qýantady. Tutynýshy kóbeıgen saıyn biz de ónim kólemin kóbeıte beremiz. Oǵan barlyq múmkindik bar.
Týrasyn aıtsaq, kásiporynda ter tógip júrgen qyzmetkerlerdiń eńbegi eresen. Qaı-qaısysy bolsyn ýaqytpen sanaspaı eńbek etýge bar. Sondaı-aq tórt túlik baǵyp otyrǵan aýyldaǵy aǵaıynmen baılanysymyz da burynǵydan bekı tústi. Bir sózben aıtqanda, biz qandaı jetistikke jetsek te, bul – aýyldaǵy aǵaıyn men kásiporyn qyzmetkerleriniń aýyzbirshiliginiń arqasynda múmkin bolyp otyrǵan jaǵdaı», deıdi seh meńgerýshisi.
S.Mateeva keltirgen derekke júginsek, kásiporyn óndirgen ónim iri qalalardan bólek, óńirdiń birqatar aýdanyna da jóneltiledi eken. Jyl ótken saıyn jergilikti turǵyndar da «Aq altyn» sehynyń sapaly ónimin satyp ala bastaǵany rasymen de kóńil qýantady.
Jambyl oblysy,
Jýaly aýdany
