О́ńirde zaǵıp jandardy qoǵam ómirinen qaltarys qaldyrmaý maqsatynda birqatar jumys atqarylyp jatyr. Máselen, oblystyq kózi kórmeıtin jáne nashar kóretin azamattar kitaphanasynyń uıytqy bolýymen alǵash ret Jambyl oblysynda «Tıflomýzeı» jobasy qolǵa alyndy. Joba aıasynda oblystyq tarıhı-ólketaný mýzeıinen «Qolmen ustap, júrekpen sezin» taqyrybynda arnaıy burysh ashyldy.
«Múmkindigi shekteýli jandarmen jumys istegen soń, olardyń psıhologııalyq jaǵdaıyna, ómirge beıimdelýine, qoǵamnan alystamaýyna mán beremiz. Bul baǵyt boıynsha kitaphanada atqarylyp jatqan jumys az emes. Zaǵıp adam óz qııalyndaǵy sıýjettermen ómir súredi. Sondyqtan qazirgi tańda kitaphana mamandary ınklıýzıvti bilim berý jáne qoljetimdi orta qalyptastyrý, áleýmettik aqparatqa qol jetkizý jumystary jáne jańa tehnologııany meńgerý tárizdi túrli jobalarǵa basymdyq berip otyr», deıdi oblystyq kózi kórmeıtin jáne nashar kóretin azamattar kitaphanasy dırektorynyń orynbasary Zarına Dúkenbaeva.
Z.Dúkenbaevanyń aıtýynsha, joba aıasynda ashylǵan buryshqa kóne Tarazdyń yqylym zamannan bergi tarıhynan syr shertetin ondaǵan jádiger qoıylǵan. Ekspozısııaǵa ornalastyrylǵan ár jádigerge Braıl qarpimen ataýy jazylyp, QR-kod arqyly aýdıojazba bastyrylypty. Nátıjesinde, zaǵıp jandar ózderiniń jeke smartfonymen mýzeıdi aralap, gıdtiń kómeginsiz aqparat alý múmkindigine ıe bolyp otyr. Kitaphana qyzmetkerleri men oblystyq tarıhı ólketaný mýzeıiniń birlesip qolǵa alǵan jobasy olardyń kókeıine qonady.
«Bul joba qazirgi kezde aýdan ortalyqtaryndaǵy mýzeılerde de jalǵasyn taýyp otyr. Shý, Merki, T.Rysqulov, Moıynqum aýdandyq tarıhı-ólketaný mýzeılerinde tarıhı, arheologııalyq kolleksııalar, nýmızmatıka, tarıhı-turmystyq zattar, qoljazbalar men baspa qujattary, beıneleý jáne sándik óner týyndylary jáne ózge qundylyqtar zaǵıp jandardyń nazaryna usynylsa, Qordaı aýdandyq ádebı-memorıaldyq mýzeıi qordaılyq oqyrmandar úshin Kenen Ázirbaevtyń ómiri men ónerine arnalǵan arnaıy burysh ashty», deıdi Z.Dúkenbaeva.
Elimiz boıynsha alǵash ret Jambyl oblysynda qolǵa alynǵan joba múmkindigi shekteýli azamattar tarapynan zor qyzyǵýshylyq týǵyzyp otyrǵany anyq. Soǵan qaraǵanda «Tıflomýzeı» jobasy aldaǵy ýaqytta da jalǵasatyn kórinedi.
Jambyl oblysy
