QYZYLORDA. 19 mamyr. Syr topyraǵynda týyp, ónerimen Qazaqstandy ǵana emes alys-jaqyn sheteldi moıyndatqan has talant, tanymal ánshi, daryndy kompozıtor Batyrhan Shókenovti jerlesteri eske aldy. Bul týraly egemen.kz saıty habarlaıdy.
Ortalyq alańda ótken sharaǵa onyń tyńdarmandary men ómirdegi jáne ónerdegi dostary, baýyrlary, anasy keldi. Sharaǵa oblys ákimi Qyrymbek Kósherbaev qatysyp, talantty ánshini eske aldy.
«Syr boıynyń talantty uly, óner tarlany Batyrhan Shókenovtiń qazasy barsha qazaq eliniń qabyrǵasyn qaıystyrdy. Batyrhandy úlken de, kishi de qadir tutty, jas ta, jasamys ta ánderin jatqa aıtty. Ol elden jyraqta júrse de árqashan óz Otanynyń naǵyz patrıoty boldy. Batyr xalyqaralyq IýNISEF balalardyń quqyǵyn qorǵaý qorynda da óziniń azamattyǵyn kórsete aldy. Sońynda óshpes iz qaldyrǵan Batyrxan Shókenovti xalqy umyt qaldyrǵan joq. Elimizdiń barlyq aımaqtarynda eske alý sharalary uıymdastyrylyp, ánderi shyrqalýda. Shókenovtiń shyǵarmalaryna sýsyndap ósken myńdaǵan adam áleýmettik jelilerde jyly lebizderin bildirip jatyr. Batyr baýyrymyzdyń esimi qazaq óneriniń tarıxynda altyn áriptermen máńgi jazylyp qala bermek», – dedi oblys ákimi.
Eske alý rásiminde marqumnyń belgili ánderi shyrqaldy. Batyrhan Shókenovtyń dostary ol týraly jyly estelikter aıtty. Talantty ánshiniń ómiri men ónerine arnalǵan «Saǵym dúnıe» derekti fılm kórsetilip, ómiriniń sońǵy ýaqytynda qatysqan Reseı telearnalaryndaǵy «Odın v odın» jobasynan úzindiler kórsetildi. Qazaqtyń súıikti de týma talantty ánshi ulyn eske alýǵa jınalǵandar onyń ánderin shyrqap, áýege shar ushyrdy.
Erjan Baıtiles.
Derek, sýret: egemen.kz.
