Keshe Qazaqstannyń «Aýyl» halyqtyq-demokratııalyq patrıottyq partııasynyń shtab-páterinde Prezıdent Nursultan Nazarbaevtyń bılik tarmaqtary arasyndaǵy ókilettikterdi qaıta bólý týraly konstıtýsııalyq reformalarynyń jobasyn talqylaýǵa arnalǵan konferensııa bolyp ótti.
Onyń jumysyn partııa ortalyq apparatynyń jetekshisi Farıd Aqberdıev ashyp, júrgizip otyrdy. Konferensııaǵa elimizdiń 13 aımaǵyndaǵy partııa fılıaldarynyń ókilderi qatysty. Konferensııaǵa qatysqandar, ásirese, alynyp tastalǵan normalar týraly óz pikirlerin ortaǵa saldy.
Máselen, burynǵy Prezıdent ókildigine enetin respýblıkalyq memlekettik baǵdarlamalardy Prezıdenttiń bekitý quqy endi Úkimet basshysyna beriletindigi týraly kóptegen oń pikirler aıtyldy. Osy jaıtqa baılanysty Farıd Aqberdıev Prezıdenttiń Úkimettiń sońǵy keńeıtilgen otyrysynda bildirgen pikirlerin alǵa tartyp, osy ýaqytqa deıin Elbasyna tipti aýyl máselelerimen aınalysýǵa týra kelgenin jetkizdi. Bılikti osynsha ortalyqtandyrylǵannyń kesirinen Prezıdent ákimder men mınıstrler sheshýge tıisti barlyq máselelermen aınalysýyna týra kelip otyrǵanyn kóldeneń tartty.
«Sondyqtan da mınıstrler men ákimder ózine júktelgen mindetti eshkimge qaraılamaı, batyldyqpen oryndaýy kerek qoı», dedi apparat jetekshisi. Sonymen qatar, bıliktiń vertıkaldyǵy ótken ýaqyt aralyǵynda tıimdi qyzmetter atqaryp, oń nátıjelerge qol jetkizilgendigi de aýyzǵa alyndy. Jalpy, «Aýyl» partııasy konstıtýsııalyq reformalar men Prezıdenttiń sońǵy Joldaýyn halyqqa túsindirý boıynsha 15 shara josparlaǵan eken. «Halyqpen kezdesýlerde bizge osy máseleler boıynsha kóptegen suraqtar qoıylady. Biz olarǵa tolymdy jaýaptar berýge tyrysamyz. Sonymen qatar, biz óz usynystarymyz ben pikirlerimizdi arnaýly komıssııaǵa da usynatyn bolamyz», dedi Farıd Aqberdıev.
Partııa tóraǵasy, senator Álı Bektaev Prezıdent Joldaýyn halyqqa túsindirý maqsatymen óńirlerge shyqqan Parlament depýtattarymen birge saparda júrgendikten, konferensııa jumysyna qatysa almady.
Jaqsybaı SAMRAT,
«Egemen Qazaqstan»