Biz mingen tikushaq Alataýdan asqanda, Táńirtaý silemderi kók aspannyń tireýindeı bolyp kóringen edi. Endi appaq bolyp taban astynda qalyp barady. Quddy Hantáńiriniń inileri sekildi tizilip jatyr. Tikushaq bes myń metr bıiktikke kóterilgende, Hantáńiri qasqaıyp týra aldymyzdan kórindi. Tym tákappar. Qýanǵanymnan qasymda otyrǵan aǵamnyń qolyn qysa berdim. Endi she, dál osy saparda Hantáńiri maǵan jáne tikushaqtaǵy alty adamǵa da kórinip, bárimizdi baqyt qushaǵyna bir sát bolsa da bólese eken degen nıetime jettim ǵoı. Tikushaq 5500 metrde qalyqtaǵanda shaıqala bastady. Birtindep qoıýlana bastaǵan bult áserinen odan bıikke kóterilý qaýipti ekendigin ushqysh habardar etkende «Bárekeldi, eń bastysy Hantáńirin qol sozym jerden kórdik qoı!», dep qanaǵat tuttyq.
Teńiz deńgeıinen 6995 metr bıiktikte turǵan Hantáńiriniń bir syry kez kelgen ýaqytta adamdardyń barlyǵyna birdeı kórine bermeıdi. Etegindegi Qaınar aýylyna jazǵyturym kún besinge taıaǵanda barsańyz, appaq qar qursanǵan shyń qyrlana kóz aldyńyzda turyp bir sát baqyt qushaǵyna bóleıtin kezi bolady. Bul nıetińizdiń túzýligin bildiredi. Álemdegi bıik shyńdardyń sanatynan sanalatyndyqtan bir jyldary shetelden arnaıy kelip, aptalap jatyp, bir kóre almaı ketken týrıster de bolǵan. Muz qursanyp, tumandanyp jatyp aldy. Qoldan keler qaıran joq. Taǵy bir aıta keter jaıt – keńestik zamanda Raıymbek aýdany Qarqara jaılaýynda týrısterdiń arnaýly turaǵy bolǵan. Kásibı bilikti mamandar týrısterdi bastap, tikushaqpen Qyrǵyzstan arqyly Hantáńirine aparyp, kórsetip qaıtatyn. Sóıtip, taý týrızmi damyǵan edi. Búginde úzilip qalǵan sol dástúrli jalǵastyryp, týrızmniń temirqazyǵyna aınalatyn ortalyqtyń biri – Hantáńiri. Nazar aýdarsa, ol oıdyń oryndalary haq.
Nurbol ÁLDIBAEV, «Egemen Qazaqstan»
Almaty oblysy,
Raıymbek aýdany