Domınık pen Barbara – Polsha azamattary. 23-24 jastaǵy saıahatshylar qyrkúıektiń basynda Taılandty betke alyp, elden shyǵypty. Maqsaty – Eýrazııa qurlyǵyn kókteı ótip, Taılandqa avtostoppen jetý.
Eki apta ishinde Domınık pen Barbara Lıtva, Latvııa, Reseıden ótip, Qazaqstanǵa – batys qaqpa Oral qalasyna jetipti. Internet arqyly aldyn ala tapsyrys berip qoıǵan hostelin taba almaı júrgen sheteldikterdi Berik Shadyǵalı esimdi oraldyq turǵyn kezdestirip, óz úıine ákelip, qondyryp, qonaq etipti.
– Sarytaý jaqta adasyp júr eken, ınternet ustamaıdy, Qazaqstannyń sim-kartasy joq. Kóshi-qon polısııasyna aparyp, qujattaryn rettep, qalamyzdy aralattym. Ulttyq asymyzdy berip, kelesi kúni shyǵaryp saldym, – deıdi B.Shadyǵalı.
Saıahatshylar ortaǵasyrlyq Jaıyq qalasynyń ornyn kórip, oblystyq ólketaný mýzeıin tamashalaǵan. Oral qalasynyń kóne ǵımarattaryna súısinip, jańa alańnyń sáýletin de unatypty. «Ásirese ólketaný mýzeıindegi jádigerlerge qatty tań qalyp ketti», deıdi qonaqjaı otaǵasy.
Domınık pen Barbara Facebook áleýmettik jelisinde Wystopili - Autostopem do Azji atty paraqsha ashyp, kúndelik júrgizip júr eken. Keshegi jazbasynda oraldyq dosy Beriktiń, jalpy qazaq halqynyń qonaqjaılyǵyna alǵys aıtypty.
Qazbek QUTTYMURATULY, «Egemen Qazaqstan»
ORAL