Islam yntymaqtastyǵy Uıymynyń «Ǵylym jáne tehnologııalar jónindegi birinshi sammıti barysynda ISESCO bas dırektory Abdýlazız Osman ál-Týveıdjrı ál-Farabı atyndaǵy Qazaq ulttyq ýnıversıtetiniń rektory Ǵalymqaıyr Mutanovqa ISESCO syılyǵyn tabys etti.
Abdýlazız Osman ál-Týveıdjrıdiń atap ótýinshe, qazaqstandyq ǵalym atalǵan mártebeli nagradaǵa ǵylym jolyndaǵy eńbeginiń halyqaralyq deńgeıde joǵary baǵalanyp, moıyndalǵany jáne matematıkalyq modeldeý, tehnıkalyq ári áleýmettik-ekonomıkalyq júıelerdi basqarý salasyndaǵy zor úlesi úshin marapattalǵan.
ISESCO syılyǵy Islam yntymaqtastyǵy Uıymyna múshe memleketterdiń ǵalymdaryna bıologııa, hımııa, geologııa, matematıka, fızıka jáne ǵylymı tehnologııa salalaryna qosqan aıryqsha ǵylymı-ınnovasııalyq úlesteri úshin beriledi. Syılyq sertıfıkattan, altyn medaldan jáne aqshalaı syıaqydan turady.
ISESCO-ny 1979 jyly Islam Konferensııasy Uıymy qurǵan bolatyn. Onyń quramyna 50-den astam memleket kiredi. Halyqaralyq uıymnyń qyzmeti ıslam álemi elderiniń ǵylymyn, bilimi men mádenıetin damytýǵa jáne oǵan jan-jaqty qoldaý kórsetýge baǵyttalǵan.
«Egemen-aqparat»