Qazaqstan Prezıdenti «QazÝpakTreıd» jaýapkershiligi shekteýli seriktestiginde boldy, dep habarlaıdy akorda.kz.
Elbasy kásiporynda gıps pen gıps-karton jasaý tehnologııasymen tanysty. «KazÝpakTreıd» jaýapkershiligi shekteýli seriktestiginiń negizgi qyzmeti – qurylys materıaldaryn shyǵarý. Onyń jobalyq qýattylyǵy jylyna 150 myń tonna ónimdi quraıdy. Kásiporyn 50 adamdy turaqty jumys ornymen qamtamasyz etip otyr.
Sondaı-aq, Nursultan Nazarbaevqa elimizdiń ındýstrııalyq-ınnovasııalyq damý baǵdarlamasynyń óńirdegi oryndalý barysy týraly málimdeldi. Budan bólek, Qazaqstan Prezıdentine 557 mıllıard teńgeni quraıtyn 30-dan astam jobanyń júzege asyrylýy josparlanyp otyrǵany jóninde baıandaldy. Osyǵan oraı, 6 myńǵa jýyq jańa jumys orny ashylatyn bolady.
Elbasy túrli memlekettik jobalar men baǵdarlamalardy iske asyrý nátıjesinde Jambyl oblysy qýatty ındýstrııalyq óńirge jáne elimizdiń hımııa ónerkásibiniń ortalyǵyna aınalýǵa tıis ekenin atap ótti.
Sońynda Elbasy «QazÝpakTreıd» jaýapkershiligi shekteýli seriktestiginiń jumysshylarymen jáne basshylyǵymen áńgimelesip, eńbekterine tabys tiledi.