Búgin Ońtústik Qazaqstan oblysynyń ákimi Janseıit Túımebaevtyń tóraǵalyǵymen oblys ákimdiginde selektorlyq májilis ótti. Kún tártibinde negizgi úsh másele qaraldy.
Sonyń biri – aımaqtyń 2017 jyldyń 8 aıyndaǵy áleýmettik-ekonomıkalyq damý qortyndysy boldy. Bul týraly oblystyq ekonomıka jáne bıýdjetti josparlaý basqarmasynyń basshysy Arman Sábıtov baıandama jasap, saladaǵy atqarylǵan jumystarǵa esep berdi.
Onyń aıtýynsha, oblysymyzdaǵy ónerkásip óniminiń kólemi 510,1 mlrd. teńgeni qurap, ótken jyldyń sáıkes kezeńimen salystyrǵanda 0,2 paıyzǵa artqan. Al, óńdeý ónerkásibi óniminiń kólemi 353,0 mlrd. teńgeni qurap, 2,4 paıyzǵa ósip otyr. Jyldyń qorytyndysymen ken óndirý ónerkásibi óniminiń kólemi 200 mlrd. teńgeni quraǵan.
«Oblysymyzda jeńil ónerkásip – 5,2 paıyzǵa, mashına jasaý – 32,7, hımııalyq ónerkásip – 17,3, metallýrgııa – 17,0, ózge metall emes mıneraldyq ónimder – 14,8, farmasevtıkalyq ónimder – 12,1, tamaq ónimderin óndirý – 8,4 paıyzǵa artyp otyr. Jyldyń qorytyndysymen óńdeý ónerkásibi óniminiń kólemi 570 mlrd. teńgeni quraıdy degen jospar bar», - dedi Arman Sábıtuly.
Bıyl oblysqa 266,0 mlrd. teńge ınvestısııa baǵyttalyp, 2016 jyldyń tıisti kezeńimen salystyrǵanda 21,8 paıyzǵa artqan. Al, aýyl sharýashylyǵynyń jalpy ónim kólemi 257,4 mlrd. teńgeni qurasa, mal sharýashylyǵynda mal basynyń sany ortasha eseppen 5,5 paıyzǵa kóbeıgen. Sondaı-aq, et óndirisi – 5,1, sút - 2,0, jumyrtqa – 9,1 paıyzǵa ósken.
Oblys ákimi joǵaryda atalǵan salalar boıynsha tómen kórsetkish kórsetken aýdan, qala basshylarynyń jumysyn jandandyrý qajettigin eskertti.
«Syrtqy ınvestısııa tartýdy jandandyrý qajet. Sonymen qatar basqarma basshylary men aýdan, qala ákimderi 2017 jylǵa josparlanǵan ındıkatorlardyń tolyq oryndalýyn qamtamasyz etip, ındıkatorlardyń oryndalýy týraly aqparatty aı qorytyndysymen ekonomıka jáne bıýdjettik josparlaý basqarmasyna usynýdy tapsyramyn», - dedi Janseıit Túımebaev.
Májilis barysynda oblystyq bıýdjettiń ıgerilý barysy da talqylandy. Bul týraly oblystyq qarjy basqarmasy basshysynyń mindetin atqarýshy Raqymberdi Múlkemanov baıandama jasap, jyl sońyna deıin tıisti qarjylardyń ıgerilý qajettigine toqtaldy. Bul rette oblys basshysy jergilikti bıýdjeti ıgerý maqsatyndaǵy jumystardy jetildirip, naqty jospar qurýdy júktedi.