Almatydaǵy «Alataý» dástúrli óner teatry­nyń ashylǵanyna bir jyl toldy

Ata-babanyń murasyn arqalap júrgen dástúrli ánshilerdiń ónerin nasıhattaıtyn teatrdyń jańa basshysy bolyp jýyrda ǵana taǵaıyndalǵan belgili jyrshy, folklortanýshy-ǵalym Berik Júsip elimizdiń ár aıma­ǵynan kelgen jıyrmaǵa jýyq ánshimen kezdesý ótkizip, bir­lesken memorandýmǵa qol qoı­dy. Bul qujat boıynsha dás­túrli óner teatry ár ólkede týyp, ózinshe qanat jaıyp, óz jo­ly­men órkendep kele jatqan aımaqtaǵy án men jyrdyń zama­naýı máselelerimen aına­lysýdy qyzmetiniń basty qyry etip almaq. Qazaq jerinde qa­lyptasqan ánshilik, kúıshilik, jyrshylyq mektepti ári qaraı damytyp, nasıhattaý isi de teatr­dyń júıeli aınalysatyn jospardaǵy sharýasy bolyp qala beredi. «Bul memorandým oblystaǵy ánshilerdiń jeke konsertin uıymdastyrýǵa múmkindik berse, eń bastysy, óńirlerde tanylmaı júrgen jas talanttardyń tusaýyn kesip, úlken sahnada jarqyraı kórinýine jol ashady» deıdi teatrdyń dırektory Berik Júsip. Jańa basshynyń bastamasymen taıaý arada qazaqtyń án óneri boıynsha kýrstar uıym­dastyrý máselesi de sóz boldy.

Dástúrli ónerdiń tynysyn ashyp, qoltyǵynan demep, dáripteý úshin qurylǵan «Ala­taý» teatrynyń bir jyldyǵyna oraı konsert uıymdastyrylyp, jyrdan shashý shashyp, qulaq quryshyn qandyra án áýeletken kúmis kómeı, jez tańdaı ánshi­ler kópshilikke naǵyz óner jár­meńkesin usyndy. Ártúrli án mektebiniń úlgisinde sheberligin shyńdap júrgen mýzyka maıtalmandary qazaq óneriniń árqyrly ekenin, damytqan saıyn daralyǵy aıqyndala túsetin bıik qasıetin bederledi. Qazaqstannyń eńbek sińirgen qaıratkeri Janǵalı Júzbaev aıtqandaı, «tyńdarmandar osy keshte alǵash ret kúı oryndaý sheberliginiń jeti, ánshilerdiń bes mektebi men eki birdeı jyr­shy-jyraýdyń úlgisin kórsetken myqty oryndaýshylar­dy birin­shi ret bir mezgilde, bir sahnada kórdi». Tus-tustan qoshamet bildirip, qıqý qosqan kórermenniń kótermelegenine arqalanyp alǵan ánshilerdiń ózi de: osyǵan deıin dástúrli óner ıeleriniń basy bir jerde dál osylaı toǵyspaǵan edi desti.

Aıgúl AHANBAIQYZY, «Egemen Qazaqstan»

ALMATY