Astana prosesi aıasynda Sırııa máselesi boıynsha kezekti halyqaralyq kezdesý 21-22 jeltoqsan kúnderi ótedi, dep habarlaıdy Syrtqy ister mınıstrliginiń baspasóz qyzmeti.
Habarlanǵandaı, aldaǵy kelissózder barysynda taraptar tutqynǵa alynǵandardy bosatý, qaza bolǵandardyń denelerin berý jáne iz-túzsiz joǵalǵandardy izdestirý boıynsha jumys tobynyń erejesin qabyldaýdy josparlaýda. Qatysýshylar sondaı-aq deeskalasııa aýmaqtarynyń jumys isteý máselelerin talqylap, IýNESKO nysandaryn qosa alǵanda Sırııadaǵy gýmanıtarlyq mınasyzdandyrý týraly birlesken málimdemeni bekitýdi kózdep otyr.
Kelissózderdiń qazan aıynda ótken jetinshi raýndynyń nátıjesi boıynsha kepilger-elder birlesken málimdeme qabyldaǵan bolatyn. Onda ustalǵan tulǵalardy bosatýdy qosa alǵanda, saıası prosess úshin jaqsy jaǵdaılar týǵyzý jáne atysty toqtatý maqsatynda janjaldasýshy taraptarǵa senimdi nyǵaıtý boıynsha sharalardy qabyldaý qajettigi atap ótilgen. Sondaı-aq taraptar deeskalasııa aýmaqtarynyń jumysy nátıjesinde halyqaralyq terrorızmmen kúreste ilgerileý baryn atap ótip, Jeneva prosesine sáıkes BUU qamqorlyǵymen Ulttyq dıalog kongresin shaqyrý týraly usynysty talqylaýǵa ýaǵdalasty.