Endi qostanaılyqtar kommýnaldyq qyzmet túrleriniń aqysyn bir ortalyqtan tóleıtin boldy. Qostanaıda birinshi kommýnaldyq qyzmet ortalyǵyn «Qostanaı Sý» memlekettik-kommýnaldyq kásiporny óz bastamasymen ashty.
«Endi qalalyqtar kommýnaldyq qyzmet túrleri aqysyn burynǵydaı «KTEK», «Kostanaı-Sý», «Tazalyk–2012» jáne basqa da kásiporyndardy izdep júrmeı, bir jerden, bir operatorǵa tóleıtin bolady. Bul úshin qala ákimdigi «Qostanaı Sýǵa» ǵımarat usyndy, olar ǵımaratty jóndep, retke keltirip, osy ortalyqty ashty», dedi Qostanaı qalasynyń ákimi Bazyl Jaqypov.
«Qostanaı Sý» memlekettik-kommýnaldyq kásiporny bul jumys úshin 15 mıllıon teńge qarjy jumsady. Ortalyq tańǵy 08.00-20.00-ǵa deıin úzilissiz jumys isteıdi. Bul turǵyndarǵa óte qolaıly bolmaq. «Qostanaı Sý» MKK dırektory Erkebulan Faızýlaev ortalyqty jóndeýge, jabdyqtaýǵa ketken qarjy únemdelgen, túsken tabystyń esebinen jumsalǵanyn aıtty. Sonymen qatar, munda tek kommýnaldyq qyzmettiń aqysyn ǵana tólemeıdi, tutynýshynyń oǵan qatysty suraǵy bolsa ol kásiporyndardy aralamaı-aq, osy jerden sheshýine bolady. Ortalyqta kommýnaldyq qyzmettiń 20 túriniń aqysyn tóleýge bolady, olardyń tizimi jazylǵan. Ortalyq kommýnaldyq qyzmet túrleri úshin eń kóp degende 50 teńge ǵana komıssııa ustaıtyn bolady.
Názıra JÁRIMBET, «Egemen Qazaqstan»