Qaıyrymdylyq aýksıonynyń jalpy qory 7 mıllıon teńgeni qurady, dep habarlaıdy Atyraý oblystyq óńirlik kommýnıkasııalar qyzmeti.
26 mamyr kúni Atyraýda Búkilálemdik boks serııasynyń (WSB) VIII maýsymynyń jartylaı fınaldyq oıyny ótti.
Oıyn sońynda aýksıon ótkizilip, "Astana Arlans" komandasy sportshylarynyń qolǵaptary oınatyldy. Aýksıonnan túsken qarjy 7 mıllıon teńgeni qurady. Búgin, 29 mamyr kúni túsken qarajattyń barlyǵy naýqas balalar emine jumsaldy.
- Ýáde etkendeı Atyraý oblystyq sport basqarmasymen birge 2 mıllıon teńgeni kómekke muqtaj Danlo Elersa sındromyna, serebroastenıkalyq sındromyna shaldyqqan, DSP jáne epılepsııamen aýratyn 4 naýqas balaǵa tabystadyq. Qalǵan 5 mıllıon teńgeni Koreıa elinde em alyp jatyrǵan Alıma Kópeıdiń emine jiberdik,-deıdi «Astana Arlans» komandasynyń PR-menedjeri Shyńǵys Túsibaev.
Aýyr dıagnoz qoıylyp, shuǵyl túrde emge muqtaj balalar týraly aqparat qalalyq jumyspen qamtý, áleýmettik baǵdarlamalar jáne azamattyq hal aktilerin tirkeý bóliminen alyndy.
- Meniń qyzymda sırek kezdesetin Danlo Elersa sındromy. Onyń emine jyl saıyn qomaqty qarajat ketedi, sol sebepti qalalyq bólimnen kómek suraǵan bolatynmyn. Osyndaı qasıetti aıda qoldaý kórsetkenderińizge rahmet. Biz shynymen kútpedik,- deıdi qala turǵyny Dılıara Gılaeva.