Bıylǵy jyldyń basynda Jambyl oblysynyń ákimi Asqar Myrzahmetov Taraz qalasynyń ákimdigine jolaýshylar tasymaldaýshy mekemelermen arada kelisim júrgizý arqyly ártúrli baǵyttardaǵy qoǵamdyq kólikterdi jańalaýdy mindettegen bolatyn. Osy oraıda ortalyq «Dostyq» alańynda «№1 Taraz avtobýs parki» JShS-niń birqatar júrgizýshisine jańa avtobýstardyń kiltteri tabys etildi.
Qyryq jyldan beri shahar jolaýshylaryna qyzmet kórsetip kele jatqan atalǵan seriktestik menshiginde barlyǵy 89 avtobýs tirkelgen bolsa, 66 avtobýs bekitilgen baǵyttar boıynsha halyqqa qyzmet kórsetip keledi. Endi atalǵan mekeme «Jol kartasy» damý baǵdarlamasy aıasynda jalpy quny 190 mıllıon teńgeni quraıtyn, Reseı memleketinen ákelingen ortasha syıymdylyqtaǵy 20 «Paz-32054» markaly avtobýsyn aınalymǵa qosatyn bolady. Olar keleshekte qala ishindegi №11 jáne №17 baǵyttaryndaǵy eskirgen kólikterdiń orynyn almastyrady. Barlyq kólikter gaz otynyn tutynýǵa laıyqtalǵan. Sonymen qatar, olardyń naqty ýaqyt kestesin baqylap otyrý úshin GPS júıesimen jáne avtomattandyrylǵan habarlaý qondyrǵysymen jabdyqtalǵan.
Taraz qalasy ákimdiginiń habarlaýynsha, oblys ortalyǵynda aldaǵy ýaqyttarda tasymaldaýshylarmen birlese mundaı is-sharalardy júzege asyrý óz jalǵasyn taba beretin bolady. Máselen «ÁýlıeataTransPass», «Ekspress-05», «TarazTransMotors» jaýapkershiligi shekteýli seriktestikterimen jalpy sany 39 dana ortasha jáne úlken syıymdylyqty avtobýstar satyp alý boıynsha tıisti jumystar júrgizilip keledi eken. Jýyq arada qala ishindegi №9, 12, 16, 43, 44, 47 jáne 54 baǵyttaryndaǵy eskirgen kólikter jańasymen aýystyrylady.
Hamıt Esaman,
«Egemen Qazaqstan»
Jambyl oblysy