Bul kúnderi oblys ortalyǵyndaǵy aýrýhanalar, emhanalarynda «Sıfrly Qazaqstan» memlekettik baǵdarlamasy júzege asyrylýda.
Medısınalyq mekemeler jańashyldyq aıasynda qaǵazbastylyqtan arylýda. №4 emhanada dárigerler sıfrlandyrý baǵytynda qolǵa alynǵan baǵdarlamalardy meńgerýde.
Emhana basshylyǵynyń aıtýynsha, kúndelikti tańǵy saǵat 8.00-den bastap emhanaǵa 600-den astam adam habarlasady eken.Emhanada flıýrografııa, rentgen apparatyna kezek elektrondy túrde talon arqyly júzege asyrylady. Bir aptanyń ishinde 615 adam dárigerdi úıge shaqyryp, 7953 adam qabyldaýǵa jazylǵan.
Al 369 adam qabyldaýǵa jazylýda “Damumed” mobıldi qosymshasyn paıdalanǵan. Dárigerler óz bólimshelerine tirkelgen adamdardyń densaýlyǵyna monıtorıng jasaı alady.
Bir apta ishinde 500 eńbekke jaramdylyq paraǵy ashylǵan. Onyń bári elektrondy formatta baqylanady.
Qazirgi ýaqytta tirkeý bólimi qaǵazbastylyqtan aryldy. Emhanada tuńǵysh ret turǵyndardyń qońyraýyn qabyldaıtyn arnaıy ID telefon ortalyǵy jumys isteıdi. Munda mamandar kóp arnaly telefon arqyly turǵyndardyń saýalyna jaýap berip, dáriger qabyldaýyna jazady.
Emhanada emdelýshiler úshin «Damumed» mobıldi qosymshasy jumys isteıdi. Emhanada ornatylǵan LED ekrandarda mobıldi qosymshany paıdalaný erejeleri óte qoljetimdi jáne túsindirý aqparaty bar beınerolıkter kórsetiledi.
DamuMed mobıldik qosymshasyn paıdalanýshylar dárigerdiń qabyldaýyna jazylýǵa nemese dárigerdi úıge shaqyrtýǵa, jazylǵan resepterdi jáne zerthanalyq zertteýlerdiń nátıjelerin qaraýǵa, eńbekke jaramsyzdyq paraqtaryn júkteı alýǵa múmkindigi bar.
DamuMed-dárigerler men pasıentterdiń ýaqytyn únemdeý. Qosymsha ótinishterdiń nátıjesin alý jáne nátıjege jetýdi jyldamdatady.
Emdelýshilerdi qoljetimdi túrde qajetti medısınalyq aqparatpen qamtamasyz etedi. Olardyń densaýlyǵyna qatysty qajetti sharalar týraly eske salady.
Turǵyndar úıde otyryp-aq dárigerdiń qaraýyna jazyla alady. Dárigerdi úıge shaqyrýǵa bolady. Dáriger óz jeke kabınetine kirip, úıge shaqyrǵandar men qabyldaýǵa jazylǵandardyń sanyn kóredi.
Jeke modýl arqyly emdelýshilerdiń barlyq qımyl-qozǵalysyn, emdelý qorytyndylaryn baqylaı alady.
Sondaı-aq, bólimshege tirkelgen turǵyndardyń tolyq tizimin kóre alady, olardy jasyna qaraı, basqa da qajettilikterine qaraı irikteı alady.
Bul tizim arqyly skrınıngten ótýge tıisti turǵyndardy anyqtap, em-sharalardyń kestesin túzep, habarlasa alady.
Farıda BYQAI,
«Egemen Qazaqstan»
PAVLODAR