Elbasynyń tapsyrýymen «Astanafılm» jáne «Qazaqfılm» terrıtorııasynda erkin ekonomıkalyq aımaq qurylady. Bul týraly Mádenıet jáne sport mınıstri Arystanbek Muhamedıuly Feısbýktegi paraqshasynda jazdy.
«Elbasymyz «Kınematografııa týraly» Qazaqstan Respýblıkasy Zańyna qol qoıǵany barshamyzǵa belgili. Bul aýqymdy qujat kınematografııa salasynda quqyqtyq negiz ornatýǵa baǵyttalǵan. Zań jobasy úsh jyl boıy daıyndalyp, endi bekitildi. Bul kıno salasy úshin mańyzdy, ıaǵnı ulttyq kıno óndirýshini qoldaý, ulttyq kınony prokatta shyǵarý, qazaqstandyq kınony álemdik kıno naryǵyna belsendi túrde shyǵarýǵa baǵyttalǵan osy sala úshin óte mańyzdy zań. Zań týraly keńirek aıtqym kelip otyr», - dep jazdy Arystanbek Muhamedıuly Feısbýk paraqshasynda.
Mınıstrdiń aıtýynsha, elimizdiń kınokórsetilimindegi barlyq fılmderdi qazaq tiline dýblıaj jasaý, sýbtıtr berý, kadrdan tys aýdarmany qamtamasyz etý - qazaqstandyqtardyń kópten kútken normasy. Aýdarma kórsetilim ıesiniń, dıstrıbıýtor esebinen jasalatyn bolady jáne tusaýkeser merzimine áser etpeýi kerek. Aýdarma túpnusqadan nemese reseılik naryq úshin orys tiline tárjimalanǵan nusqadan jasalatyn bolady, muny kórsetilim ıesi ózi sheshedi. Kórsetilimi shekteýli fılmder ǵana bul erejeden tys bolady. Ulttyq fılmderdiń kórsetilimine kelsek, olar qazaq tilinde bolady, basqa tilde qajettilik týyndaǵan jaǵdaıda ǵana kórsetiledi.
«Qytaı men AQSh-ta kórsetiletin fılmderdiń bári aýdıtorııa tilindegi sýbtıtrlermen qamtamasyz etiledi. Bul - eń ońtaıly jáne pármendi mehanızmderdiń biri. Qazaqstaǵa jylyna 300-den astam fılm ákelinedi jáne olar qazaq tilindegi nusqasyz kórsetiletin. Munyń ártúrli sebepteri bar, sonyń biri - quqyq ıelenýshi úshin kásibı dýblıaj jasaýǵa jumsalǵan qarjy elimizdegi kórsetilimnen túsken paıdadan asyp ketýi múmkin. Sonymen qatar zańda fılmderdi jasqa qaraı jiktep, soǵan sáıkes kategorııa berilýin, fılmderdi júıelep, esepke alyp, monıtorıng júrgizetin birińǵaı avtomattyq aqparattyq júıe qurý qarastyrylǵan», - dedi A. Muhamedıuly.
Atap aıtqanda, kıno óndirisimen aınalysatyn elderdiń ozat tájirıbesine súıene otyryp, Ulttyq kınony qoldaý memlekettik ortalyǵyn qurý júıesi qarastyryldy. Zań kınematografııany memleket tarapynan qarjylaı qoldaıtyn operator bolyp tabylatyn Ulttyq kınony qoldaý memlekettik ortalyǵy jumysynyń quqyqtyq negizin aıqyndaıdy. Ulttyq kınony qarjylandyrýdyń jańa modeli iske asady. Iri kınoóndirýshilerdi qoldaý jáne ınvestorlardy tartý maqsatynda sýbsıdııa tóleý, kınematografııa salasynda salyq jeńildikteri, kıno qyzmetin esepke alý jáne monıtorıng jasaý avtomattyq aqparattyq biryńǵaı júıe qurý, kınokolleksııalardy sıfrlandyrý sharalary qarastyrylǵan.
«Qazaqstan Úkimeti janynan ulttyq fılmderdi memleket tarapynan qarjylaı qoldaý týraly usynystar men usynymdar máselesimen aınalysatyn konsýltatıvtik-keńesshi organ - Ulttyq fılmderdi memleket tarapynan qarjylaı qoldaý máseleleri boıynsha mekemearalyq komıssııa qurylady. Elbasymyzdyń tapsyrýymen «Astanafılm» jáne «Qazaqfılm» terrıtorııasynda erkin ekonomıkalyq aımaq qurý máselesi qarastyryldy. Jańalyqtar osyndaı! Biz bárimiz Elbasymyzdyń Zańǵa qol qoıýyn asyǵa kúttik. Kınematografııamyzdyń damýynda sheshýshi kezeń bolyp tabylatyn Táýelsiz Qazaqstan tarıhyndaǵy «Kınematografııa týraly» tuńǵysh zań qabyldanýymen barshańyzdy quttyqtaımyn!», - dep jazdy mınıstr.
Eske sala keteıik, bıyl qańtardyń basynda Memleket basshysy Nursultan Nazarbaev kınematografııa salasynda quqyqtyq negizdemelerdi belgileýge baǵyttalǵan «Kınematografııa týraly» Qazaqstan Respýblıkasynyń Zańyna qol qoıdy.