Qazaqstan Prezıdenti «Equus: Jylqy tarıhy» atty derekti trılogııanyń ekinshi bóliminiń tanystyrylý rásimine bardy.
Fılmdi rejısser, antropolog Naıobı Tompson men qazaqstandyq prodıýser, zertteýshi Nurbol Baımuhanov jetekshilik etetin kanadalyq top elimizdiń aýmaǵynda túsirgen. Bul fılmge quramyna otandyq sýretshiler, ártister, kaskaderler, dýblerler men bezendirýshiler engizilgen shyǵarmashylyq top tartylyp, amerıkalyq kompozıtor Darren Fangtiń mýzykasy paıdalanyldy.
Derekti fılmde tirshiligi jylqynyń qolǵa úıretilýine baılanysty óristegen Qazaqstan aýmaǵyndaǵy ejelgi mádenıetter kezeńderi ǵylymı-zertteý jumystary men zamanaýı aqparattyq tehnologııa negizinde qaıta jańǵyrtylǵan. Bul úderis adamzat kommýnıkasııasyna qatysty jańa júıeniń qalyptasýyn aıqyndap, kóshi-qonnyń jandanýyna jáne ejelgi memleketterdiń paıda bolýyna jol ashty.
Derekti trılogııa 2019 jylǵy naýryzda 50 eldiń, sonyń ishinde Kanadanyń (CBC), AQSh-tyń (PBS), Germanııanyń (ZDF), Fransııanyń (ARTE), Danııanyń (DR) jáne Qazaqstanyń («Qazaqstan» RTRK) ulttyq telearnalarynda kórsetiledi dep josparlanyp otyr.
Sonymen qatar, Nursultan Nazarbaev Aqparat jáne kommýnıkasııalar mınıstrliginiń jańǵyrtylǵan Ortalyq kommýnıkasııalar qyzmeti baspasóz ortalyǵynyń jumysymen tanysty. Bul ortalyq «Qazmedıa ortalyǵy» tehnologııalyq keshenimen tolyqtaı biriktirilgen ári sońǵy úlgidegi zamanaýı quraldarmen jabdyqtalǵan kópfýnksııaly medıa alań sanalady.