19-20 naýryz aralyǵynda Syrtqy ister mınıstriniń orynbasary Ermek Kósherbaev bastaǵan Qazaqstan delegasııasynyń Ispanııaǵa jumys sapary ótti. Bul týraly Syrtqy ister mınıstrliginiń baspasóz qyzmeti habarlady.
Sapar aıasynda E. Kósherbaev Ispanııanyń saýda jónindegi Memlekettik hatshysy, Qazaqstan-ıspan úkimetaralyq komıssııasynyń teń tóraǵasy Shıana Mendes, «Acciona Energy» energetıkalyq kompanııasynyń Prezıdenti Rafael Mateo, Ispandyq eksporttaýshylar men ınvestorlar klýbynyń músheleri, sondaı-aq jetekshi ıspan BAQ ókilderimen kezdesýler ótkizdi.
Sapardyń negizgi tarmaqtarynyń biri Qazaqstan delegasııasynyń Qazaqstan-Ispan bıznes-forýmynyń jumysyna qatysýy bolyp, onyń sheńberinde elimizdiń ınvestısııalyq múmkindikteri, energetıka, ónerkásip, agroónerkásiptik keshen, ınfraqurylym jáne qarjy salalaryndaǵy birqatar jobalar, sondaı-aq «Astana» Halyqaralyq qarjy ortalyǵynyń múmkindikteri usynyldy.
Oǵan qosa, bıznes-forýmnyń nátıjesi boıynsha qazaqstandyq jáne ıspan isker toptarynyń birqatar kezdesýleri oryn aldy.
Aıta keterlik jaıt, 2018 jyly Qazaqstan men Ispanııa arasyndaǵy taýar aınalymy 2 mlrd. AQSh dollardan asyp, onyń ishinde Qazaqstannan Ispanııaǵa eksport 1 mlrd. 862 mln. dollaryna jetse, Ispanııanyń Qazaqstanǵa ımport kólemi 179,5 mln. dollaryn qurady.