Ortalyq alanǵa kıiz úıler tigilip, ulttyq dástúrge saı oıyn-saýyq ótkizilip, jurt shat-shadyman. Oblys ákimi Qyrymbek Kósherbaev quttyqtaý sózinde bıylǵy jyl ereksheligine toqtaldy.
«Bul kúni renjisken adamdar tabysyp, bir dastarhannan dám tatyp, bir-birine yrys-nesibe tilegen. Biz úshin Naýryz meıramy - ótkendi saralap baǵamdaıtyn, bolashaǵymyzǵa bastaý alatyn erekshe kezeń. Sonyń birden-bir dáleli – keshegi Elordada ótken tarıhı sát. Táýelsiz elimizdiń negizin qalaýshy, Tuńǵysh Prezıdent, Elbasy Nursultan Ábishuly Nazarbaev óz ókilettigin toqtatý týraly sheshim qabyldady. Bul sát bizdiń Táýelsiz elimizdiń, halqymyzdyń dúnıedegi joǵary abyroıyn taǵy da bıikke kóterdi, eldiń birligi men yntymaǵynyń dáleli, saıası turaqtylyq pen mádenıettiń úlgisi boldy deýge ábden bolady. Osy múmkindikti paıdalana otyra Elbasynyń sózimen «Alashtyń anasy» ataǵan Syr halqynyń atynan Nursultan Ábishuly Nazarbaevqa myń da bir rahmet aıtyp, uzaq ǵumyr, jasampaz eńbeginiń jemisin kóre berińiz degen júrekjardy tilegimizdi aıtýǵa ruqsat etińizder! Jańa Prezıdentimiz Qasym-Jomart Kemeluly Toqaevqa óziniń ustazy – Elbasynyń sarabdal saıasatyn pármendi jalǵastyrýda qazaqstandyqtarmen birge jańa jetistikterge jetýine tilektepsiz» dedi ol.
Qyrymbek Kósherbaev Elbasy syndarly saıasatynyń arqasynda oblystyń respýblıkada birqatar mańyzdy kórsetkishter boıynsha, sonyń ishinde ınvestısııa tartý, óńdeý ónerkásibin damytý jáne kásipkerlikti qoldaýda kóshbasshy bolyp kele jatqanyn atap ótti.
Baqtııar TAIJAN,
«Egemen Qazaqstan»
Qyzylorda oblysy