Qarjy mınıstri Álıhan Smaıylov atap ótkendeı, qujat Qazaqstandy damytýǵa, halyqtyń ómirin jaqsartýǵa arnalǵan mańyzdy sharalardy qarjylandyrýǵa baǵyttalǵan.
«Respýblıkalyq bıýdjet túsimderiniń naqtylanǵan boljamy 821 mlrd teńgege ulǵaıýymen 10 trln 569 mlrd teńgeni quraıdy. Bul túsimder kedendik ákimshilendirýdi kúsheıtý nátıjesindegi 200 mlrd teńge kólemindegi qosymsha kirister, Ulttyq qordan kepildendirilgen transfertti 250 mlrd teńgege ulǵaıtý, tikeleı ınvestısııalar qoryn qurýǵa Ulttyq qordan 370 mlrd teńge somasynda nysanaly transfert tartý nátıjesinde qamtamasyz etiledi», –qarjy mınıstri Álıhan Smaıylov.
Mınıstrdiń aıtýynsha, 2019 jyly respýblıkalyq bıýdjettiń shyǵystary 1 trln 168 mlrd teńgege ulǵaıa otyryp, naqtylaýdyń nátıjesinde 11 trln 895 mlrd teńgeni quraıdy. Bıýdjetti naqtylaýdyń negizgi baǵyty «Áleýmettik qamqorlyq» jańa áleýmettik sharalardy iske asyrýǵa arnalypty. Atqarylýy tıis is-sharalar boıynsha 444,3 mlrd teńge bólinedi.
« Qarajat ataýly áleýmettik kómek tólemderin ulǵaıtýǵa, múgedek balany tárbıelep otyrǵan ata-analarǵa, qamqorshylarǵa járdemaqy, sondaı-aq bala kúninen birinshi toptaǵy múgedekke kútim jasaý jónindegi járdemaqylar mólsherin ulǵaıtýǵa jáne bıýdjet salasynyń aqysy tómen qyzmetkerleriniń jalaqysyn arttyrýǵa baǵyttalatyn bolady», – dep naqtylady premer-mınıstriniń birinshi orynbasary – qarjy mınıstri. Qarjy jaǵynan qamtamasyz etilýi naqtylanǵan bıýdjet jobasynda kórinis tapqan is-sharalardyń taǵy mańyzdy blogy – «Jastar jyly». Bul baǵyt boıynsha respýblıkalyq bıýdjetten qosymsha 24,6 mlrd teńge bólinetin bolady. Odan keıingi mańyzdy baǵyt – «Qazaqstan ınvestısııalyq damý qory» tikeleı ınvestısııalar qoryn qurý. «Qor shıkizattyq emes sektorda sheteldik ınvestorlarmen birlesip ınvestısııalaý negizinde iri serpindi jobalardy iske asyrý úshin qurylady», – dedi Álıhan Smaıylov.
Bıýdjetti naqtylaý aıasynda buryn aıtylǵan bastamalardy iske asyrý jalǵastyrylatyn bolady. Túrkistan oblysy men Astana qalasyn damytýdyń keshendi josparlaryn iske asyrýǵa qosymsha túrde tıisinshe 42,3 mlrd teńge jáne 21,8 mlrd teńge baǵyttaý usynylady. О́ńirlik ınfraqurylymdy damytýǵa Túrkistan oblysynyń nysanaly transfertteriniń jalpy kólemi 60 mlrd teńge, Astana qalasyna 140 mlrd teńgeni qurady. «Bıyl óńirlerge nysanaly transfertterdiń jalpy kólemi 1 trln 562,7 mlrd teńgeni nemese shyǵystardyń jalpy kóleminiń 13,1 paıyzyn, al sýbvensııalardy esepke alǵanda 26,5 paıyzdy quraıdy», – dedi mınıstr.
Gúlbarshyn SABAEVA,
«Eqemen Qazaqstan»
ALMATY