Kýveıttegi sary qurlyq dodasynda ol 10 shaqyrymǵa júzýden top jardy. Sondaı-aq, taǵy bir qazaqstandyq sportshy Lev Cherepanov úshinshi oryn ıelendi.
«Kýveıttegi jarys ońaı bolǵan joq. Kún ystyq, tolqynnyń ekpini tym qatty. Bir aýyz sózben aıtqanda, sý sportshylar úshin óte aýyr. Mundaı jaǵdaıda sportshylardyń nátıjesi azdap tómendeıdi. Dese de, bári birdeı jaǵdaıda júzgen soń, Vıtalııdiń jeńisine eshkimniń kúmáni joq. Ol óz mindetin artyǵymen oryndap shyqty. Al úshinshi oryn ıelengen Lev Cherepanov áli jas. Ol chempıonatta top jarǵan Hýdıakovtan bir mınýttan az ýaqytqa qalyp qoıdy. Cherepanovtyń áli talaı jeńiske jeterine senimdimiz», - deıdi ashyq sýda júzýden Qazaqstan komandasynyń bas bapkeri Nıkolaı Zagrısenko.
Aıta ketelik, sý sporty túrlerinen Azııa federasııasy qurlyq chempıonatyn lısenzııalyq sanattaǵy týrnırler qataryna qosty. Jarys barysynda Olımpıadanyń eki lısenzııasy sarapqa salyndy.
Olımpıada baǵdarlamasyna enetin 10 shaqyrymdyq jarysta jeńiske jetken erler men áıelder atalǵan lısenzııaǵa ıelik etken bolatyn.
Vıtalıı Hýdıakov 5 shaqyrymǵa júzýden Azııa chempıony atanǵanyn esterińizge salamyz.