«Osy ýaqyttaǵy jaǵdaı boıynsha, oblystyń medısınalyq mekemelerine zardap shekken 31 adam jetkizildi. Sońǵy málimetter naqtylanýda», - delingen basqarma aqparatynda.
Naýqastardyń basym bóligi Oblystyq klınıkalyq aýrýhanada jatyr. Olarǵa barlyq qajetti medısınalyq kómek kórsetilýde. Arystaǵy tótenshe jaǵdaıǵa oraı Ordabasy aýdanynda medısınalyq shtab quryldy. Túrkistan oblysy Densaýlyq saqtaý basqarmasynyń basshysy Muqan Egizbaevtyń basqarýymen shuǵyl jumystar júrgizilip jatyr. Ordabasy aýdandyq ortalyq aýrýhanada jáne Oblystyq klınıkalyq aýrýhanada 200-den astam naýqasqa arnalǵan oryn daıyndaldy. Jedel járdem brıgadasynyń 30 kóligi Shymkent qalasyna kirer 3 jolǵa qoıyldy. Qajet bolǵan jaǵdaıda birneshe aýdandardan aldyrylǵan qosymsha jedel járdem kólikteri daıyn.
«Oblystyq klınıkalyq aýrýhanadan travmatolog, hırýrg, reanımatolog dárigerler qurylǵan medısınalyq shtabqa jınaldy. Qazirgi kezde jaraqat alǵandar joq. Evakýasııa jumystary júrgizilip jatyr. Arys qalalyq ortalyq aýrýhanasy men emhanasynan naýqastar evakýasııalandy. Mamandar da jedel járdem kólikteri de oblys boıynsha jetkilikti», - delingen aqparatta.
Aıta keteıik, buǵan deıin zardap shekken 11 adam Shymkent aýrýhanasyna jetkizilgen bolatyn.