О́ńirlik kommýnıkasııalar qyzmetinde ótken brıfıngte «Azamattarǵa arnalǵan úkimet» memlekettik korporasııasy» Aqmola oblysy boıynsha fılıalynyń dırektory Baýyrjan Erimbetov memlekettik qyzmetterdi onlaın rejımde kórsetý tártibi týraly keńinen túsindirip ótti.
–Elimizde koronavırýs juqpasy taralýyna baılanysty birqatar shekteý sharalary qolǵa alynǵany belgili. Halyqqa qyzmet kórsetý ortalyqtary jumysyn ýaqytsha toqtatty. Alaıda, turǵyndar memlekettik qyzmetti elektrondy formatta ala alady. Búgingi tańda memlekettik qyzmetterdiń 80 paıyzy eGov.kz elektrondy úkimet portalynda qol jetimdi.Keıbir servıster men qyzmetterdi eGovmobile mobıldi qosymshasy, Telegrambot, facebook, VKkontakt áleýmettik jelileri arqyly alýǵa bolady, –dedi«Azamattarǵa arnalǵan úkimet» memlekettik korporasııasy» Aqmola oblysy boıynsha fılıalynyń dırektory Baýyrjan Erimbetov.
Sonymen qatar, aqmolalyqtar onlaın rejımde memlekettik qyzmet alý kezinde tolǵandyrǵan saýaldaryn qoıýlary úshin halyqqa qyzmet kórsetý ortalyqtarynyń 1800-den astam bilikti mamandary men 1414 baılanys ortalyǵynyń qyzmetkerleri tegin konsýltatıvtik kómek beretin bolady. Mundaı Call-ortalyqtar bir mezette 1000 adamǵa keńes bere alady dep josparlanýda. Call-ortalyqtar dúısenbi-senbi aralyǵynda saǵat 9.00-den keshki 20.00-ge deıin jumys isteıdi.
Brıfıngte fılıal dırektory naýryzdyń 21-ine deıin qujattaryn halyqqa qyzmet kórsetý ortalyǵyna tapsyryp úlgergen azamattar daıyn qujattardy sol halyqqa qyzmet kórsetý ortalyǵynda qujatty tapsyrý ornynan ala alatynyn jetkizdi. Búgingi tańda oblysymyzdaǵy halyqqa qyzmet kórsetý ortalyqtarynda 21 daıyn qujatty berý terezesi jumys isteıdi. Oblys turǵyndaryna qujattary tek osyndaı jolmen beriledi. Kókshetaý qalasyna kelsek, naýryzdyń 30-ynan bastap qala boıynsha Áýezov kóshesi 189 mekenjaıynda ornalasqan №1 halyqqa qyzmet kórsetý ortalyǵynda biryńǵaı tapsyrý terezesi jumys isteýde. Sondaı-aq, onlaın rejımde kólikterin qaıta tirkegen jáne júrgizýshi kýálikterin aýystyrǵan avtokólik ıeleri daıyn qujattaryn oblystyq mamandandyrylǵan halyqqa qyzmet kórsetý ortalyǵyna baryp alýlaryna bolady. Sóziniń sońynda fılıal dırektory barsha aqmolalyqtardy úıden shyqpaýǵa, sanıtarlyq-epıdemıologııalyq sharalardy ustanýǵa, memlekettik qyzmetterdi onlaın alyp, osylaısha jaqyndarynyń densaýlyǵyn saqtaýǵa shaqyrdy.
Brıfıngke qatysqan fılıal dırektorynyń orynbasary Nurbek Qaıyrjanov ótken aptadan beri memlekettik qyzmet túrleri qashyqtyqtan kórsetilip jatqannan keıin turǵyndardan elektrondy sandyq qoltańba (ESQ) alýǵa ótinishter kóptep túsip jatqanyn aıtty. Sebebi, elektrondy formatta kórsetiletin barlyq memlekettik qyzmetterdi alý úshin azamattardyń ESQ-sy bolýy mindetti.
–Tótenshe jaǵdaı jáne karantın kezinde azamattarymyz elektrondy sandyq qoltańbany úıden shyqpaı-aq alýlary úshin bir top programıster jemisti jumys istedi. ESQ-ny onlaın alý úshin tulǵany sáıkestendirý qajet. Ol úshin fotoǵa túsip, jeke kýáligińizdiń sýretin jiberesiz jáne vıdeo arqyly baılanysqa shyǵatyn halyqqa qyzmet kórsetý ortalyǵy mamanynyń suraqtaryna jaýap beresiz, – dedi Nurbek Qaıyrjanov. ESQ-ny osyndaı tásilmen alý jeke tulǵalar jáne zańdy mekemelerdiń birinshi basshylary úshin qoljetimdi. Búgingi tańda turǵyndarǵa 20 myńnan astam ESQ qashyqtyqtan berilgen.