Arnaıy qurylǵan shtab qyzyl sý qaýpi joǵary óńirlerde tótenshe jaǵdaı bólimderin shoǵyrlandyryp, ınjenerlik qorǵaý sharalaryn atqarýda.
Qazirgi tańda Atbasar, Astrahan, Zerendi aýdandary jiti baqylaýǵa alynǵan. Ondaǵan eldi mekendi sý basý qaýpi bar. Azamattyq qorǵanys salasynyń mamandary Elorda mańyndaǵy Talapker men Ilınka, Kolýton ózenin boılaı ornalasqan eldi mekenderge alańdaýshylyq bildirip otyr.
– Atbasarǵa keler bolsaq, munda jaǵdaı turaqty. Mamandarymyz ózen ańǵaryn turaqty baqylaýǵa alǵan. Zerendi aýdanynyń orman qoınaýyndaǵy qar mólsherin eskersek, Jabaı ózenindegi sý deńgeıi shekti kórsetkishine jetýi yqtımal. Alaıda, biz qalada tıisti kúsh pen tehnıkany shoǵyrlandyrdyq. Bul sý basý qaýpine qarsy jedel áreket etýge múmkindik beredi, - deıdi Ishki ister mınıstriniń orynbasary Iýrıı Ilın.
Atbasarda sý basý qaýpi bar aýmaqta áli de 450 otbasy qonystanǵan. Oblys basshylyǵy olardy qaýipsiz aýmaqqa kóshirý úshin 500 páterli 5 turǵyn úı qurylysynyń jobalyq-smetalyq qujattamasyn ázirlegen. Aýdan ortalyǵynda tótenshe jaǵdaı bólimderi men arnaıy tehnıka shoǵyrlandy. Olar áleýmettik mańyzy bar nysandardy qorǵaý jumystaryn atqarýda.
– Kóktemgi sý tasqynyna qarsy keń kólemdi jumys atqaryldy. Arnaıy shtab óńirdegi jaǵdaıdy táýlik boıy baqylaýda ustap otyr. О́zen jaǵalaýlaryn bekitý maqsatynda 50 shaqyrymnan astam qum bóget tóseldi. Inertti zattar toltyrylǵan qaptar ázirlendi, - deıdi Aqmola oblysynyń ákimi Ermek Marjyqpaev.
Mamandar sý basý qaýpi bar aýmaqta ornalasqan úsh mektepti qum toltyrylǵan 24 myń qappen qorshap tastady.
О́ńirde karantın sharalary da qatań saqtalýda. «Atbasar – Shýıskoe» baǵytyndaǵy baqylaý beketinen táýligine 150-200-ge tarta kólik ótedi. Qalada barlyǵy 6 beket ornatylǵan. Mamandar ár 8 saǵat saıyn 3 aýysymmen baqylaý júrgizýde. Qazir Atbasarda 38 adam karantınge alynǵan.
Sandyqtaý, Zerendi aýdandarynda da sý basý qaýpi áli de bar. Bul óńirlerdegi orman ishindegi qar erı qoıǵan joq.