Kókshetaýdan Astrahan aýdanyna qarǵyn sýdan adamdardy qutqarý úshin arnaıy top attandy.
Eger qarǵyn sý adam ómirine qaýip tóndirse, qutqarýshylar aýyl turǵyndaryn kóshirmek. Qazir oblystyq tótenshe jaǵdaılar departamenti men jergilikti atqarýshy organdardyń bar kúshi Staryı Kolýton eldi mekenine qarǵyn sýdy kirgizbeýge jumyldyrylýda. Sońǵy táýlikterde Kolýton ózenindegi sý mólsheri kúrt kóbeıdi. Sol sebepti eldi mekendi basyp qalý qaýpi týyndap tur.
Aýyl irgesinen 500 tekshe metrge jýyq sý sorylyp, turǵyn úılerdiń mańaıy qum toltyrylǵan qaptarmen qorshaldy. Sáýirdiń 10-11 kúnderi Kolýton ózeniniń boıyndaǵy 15 jerde keptelgen seń jaryldy. Eger qyzyl sý eldi mekenge ene qalsa, adamdardy ýaqytsha panalatý úshin aýyldaǵy orta mektepti daıyndap qoıǵan, oǵan qosa Kovylenka jáne Jaltyr eldi mekenderindegi mektepter de jabdyqtalýda.
Oqys oqıǵa týraly Aqmola oblystyq tótenshe jaǵdaılar departamenti basshysynyń orynbasary Qanat Dospaev habarlady. Onyń aıtýynsha, departament qyzmetkerleri tas-túıin daıyn otyr. Tasqyn sýmen kúresýge qajetti qural-jabdyqtardyń barlyǵy bar.
2019 jyly Staryı Kolýton eldi mekenin qarǵyn sý basyp qalyp, biraz ýaqyt qatynas úzilgen bolatyn.
Aqmola oblysy