2018-2020 jyldar aralyǵynda qalada 51 balanyń terezeden qulaý oqıǵasy tirkeldi, dep habarlady elorda ákimdiginiń baspasóz qyzmeti.
Nur-Sultanda «О́rt qaýipsizdigi jáne balalardyń terezeden qulaý oqıǵalary» taqyrybynda brıfıng ótti. TJD ókilderi balalardy qaıǵyly oqıǵadan saqtaýdyń negizgi erejelerin eske saldy. Qutqarýshylar birinshi kezekte balalardy eshqashan jalǵyz qaldyrmaýǵa keńes beredi.
«Terezege jaqyn turǵan jıhazdyń barlyǵyn jyljytý kerek, sonda jaqtaýǵa shyǵa almaıdy. Moskıt toryna eshqashan senýge bolmaıdy», – dedi mamandar.
Oǵan qosa, terezege qorǵanysh quraldaryn ornatý kerek, sonda balalar terezeni birneshe santımetrden artyq asha almaıdy.
«Terezege tor ornatyp, qorǵańyz. Eger balaǵa terezeden bir nárse kórsetetin bolsańyz, myqtap ustańyz. Búldirshinniń shapshań qımyldaryna daıyn bolyp, qurǵaq qolmen balany kıiminen emes, ózin myqtap ustaý qajet. Eger saqtandyrý quraldaryn ornatýǵa múmkindik bolmasa, esiktiń tutqasyn burap alyp tastaý kerek. Qajet kezinde ashyp, paıdalanǵan soń jaýyp otyrýdy umyptaǵan jón», – dedi TJD.
Aıta keteıik, 2018 jyldan 2020 jylǵa deıin elordada 51 bala terezeden qulady. Onyń 13-i kóz jumyp, 38-i túrli jaraqatpen aýrýhanaǵa jatqyzyldy.