Almatydaı úlken qalada koronavırýs indeti aýyztyqtaldy dep aıtýǵa áli de erte. Jańadan juqtyryp jatqandar bar, ótken táýlik ishinde ǵana indet belgisi baıqalǵan 49 oqıǵa anyqtalsa, bir apta ishinde – 334 adamnyń vırýs juqtyrǵany belgili boldy. Sonymen Almatyda búgingi deıin 2790 oqıǵa tirkelip, 10 adam qaıtys boldy.
– Indetti juqtyrý statıstıkasy – pandemııanyń áli de aıylyn jımaǵanyn kórsetedi. Osyny eskere otyryp, qalanyń bas sanıtarlyq dárigeri ári sanıtarlyq-epıdemıologııalyq jaǵdaıǵa jaýapty adam retinde, sońǵy kezderi áleýmettik jelilerde tarap jatqandaı, eldi adamdar kóp jınalatyn buqaralyq sharalar men mıtıngke shaqyrýǵa jol bermeýge shaqyramyn, – dep málimdeme taratty búgin Almaty qalasynyń Bas sanıtarlyq dárigeri Jandarbek Bekshın.
Bas sanıtarlyq dáriger qalada epıdemııa áli de jalǵasyp jatqan kezde adamdardyń ómiri men densaýlyǵyna qaýip tóndirý baryp turǵan jaýapsyzdyq ekendigin alǵa tarta kele: «Álemdik tájirıbe kórsetip otyrǵandaı, kópshiliktiń jınalýy, jaqyn aralasýy azamattardyń indetti jappaı juqtyrýyna ákelip soǵady. Álemniń kóptegen elderinde osylaı boldy.
О́ıtkeni, mıtıngter juqtyrý oshaǵy bolyp tabylady. Eger, mundaı buqaralyq sharalar indetti juqtyrýǵa sebepshi bolsa, onda mıtıngterdi uıymdastyrýshylar zańnamaǵa sáıkes jaýapqa tartylady, tipti qylmystyq is qozǵalady.
Osyndaı buqaralyq sharalarǵa qatysýshylar indet juqtyratyn bolsa, onda epıdemıologııalyq tekserý aıasynda shettetiledi», - dedi ol.
Jandarbek Bekshın COVID-19 juqtyrǵandar men olarmen baılanysta bolǵandar, aralasqandar, meıli olar indetti kópshilik jerde nemese úıde juqtyrsyn, provızorlyq jáne karantındik gospıtalda oqshaýlanatyndyǵyn atap, sanıtarlyq-epıdemıologııalyq hattamanyń talaptary osyndaı, biz ony mindetti túrde oryndaımyz, dedi.
Almaty qalasynyń Bas sanıtarlyq dárigeriniń aıtýynsha, hattamaǵa sáıkes, sanıtarlyq-epıdemıologııalyq qyzmetkerler karantın rejıminde jappaı jıyndarǵa qatysqan azamattardy tirkep, vıdeotúsirilim júrgizedi.
Sondaı-aq ol BAQ arqyly tómendegideı tezısterdi taratty:
Al tirkeý qatysýshylar sanyn eseptep, juqtyrý oshaǵynyń epıdemıologııalyq tekserýin odan ary júrgizip, koronavırýstyń taralýynyń aldyn alý úshin qajet.
Buqaralyq sharalarǵa, mıtıngterge qatysýshylar koronavırýs juqtyrýdyń epıdemııalyq tizbegin quraıdy.
Osynyń saldarynan indet sizdiń úıińizge, otbasyńyzǵa taraıdy, eń aldymen balalarǵa jáne qart adamdarǵa qaýip tóndiredi.
Mine, sondyqtan men buryndary Almaty qalasynyń aýmaǵynda túrli buqaralaryq sharalardy ótkizýge tyıym salý jóninde qaýly qabyldaǵan edim.
Qart adamdar men burynnan qalyptasqan syrqaty bar jandardan adamdar kóp jınalatyn jerlerden aýlaq júrýdi suraımyn. О́ıtkeni, siz indetti tez juqtyratyndar sanatyna jatasyz.
Budan ózge, jappaı juqtyrý qaýpiniń bolýy múmkin ekendigin eskere otyryp, tıisti qyzmetterden adamdar kóp jınalatyn oryndarǵa dezınfeksııa júrgizýdi kúsheıtýdi talap etemin.
Meniń talaptarym men ótinishterim qalanyń ár turǵynynyń densaýlyǵyn qorǵaý men sanıtarlyq-epıdemıologııalyq jaǵdaılardy jaqsartýǵa negizdelgen.
Sondyqtan barlyq almatylyqtardan sanalylyq pen jaýapkershilik tanytýdy ótinemin. О́ıtkeni, qoǵamnyń densaýlyǵy árqaısymyzdyń jeke qaýipsizdik sharalaryn múltiksiz oryndaýymyzdan quralady.