Eger oqyrman esinde bolsa, ótken dúısenbi kúni alańsyz jumysyna ketip bara jatqan Almaty qalasy Naýryzbaı aýdandyq Halyqqa qyzmet kórsetý ortalyǵynyń qyzmetkeri Erjan Ábdirazaqov eki adamnyń ómirin qutqaryp qalǵan edi, - dep habarlaıdy Egemen.kz
Erjan ekinshi aýysymdaǵy jumysyna kele jatyp, jolda adamdardyń jınalyp turǵanyn baıqap, toqtaıdy. Bul kezde alda ketip bara jatqan polısııa kóligi de tejegishin basady.
Polısııa qyzmetkerleri birden TJ qyzmetin shaqyrady. Al Erjan sý qubyry qudyǵynan yńyrsyp jatqan daýystardy estıdi. Jaqyndap kelip qaraǵanda ishinde shyǵýǵa dármensiz, esinen aıyrylyp jatqan eki jigitti kóredi. Erjan Ábdirazaqov oılanyp jatpastan aq kóılegin sheship, janynda turǵan áıeldiń oramalyn dymqyldap, murnyna baılap, qudyqqa túsedi. Oǵan Amanjol Janseıitov degen azamat kómektesedi. Ekeýlep júrip es-tússiz jatqan azamattardy qudyqtan shyǵarady. Jedel járdem kelip, alǵashqy dárigerlik kómek kórsetip, ári qaraı aýrýhanaǵa alyp ketedi.
Sonymen káriz qudyǵynan aman qalǵan "Almaty sý" mekemesiniń qyzmetkerlerinińi biri aýrýhanadan shyqty. Qalqamandaǵy №7 aýrýhanadan aman-esen aıyqqan 25 jastaǵy Nurjandy shyǵaryp alýshylar qatarynda onyń qutqarýshysy, HQO qyzmetkeri Erjan Ábdirazaqov ta boldy.
Erjan ózi qutqarǵan jigitterdiń halin bilip, aýrýhanaǵa baryp turǵan. Jansaqtaý bóliminde jatqan jigitterge jibermese de, týystary, aýrýhana dárigerleri arqyly jaǵdaılaryn bilip otyrypty. Nurjan aman-esen aýrýhanadan shyqqanda da janynan tabyldy.
Ajaldan aman qalǵan Nurjan óziniń qutqarýshysy Erjan aǵasyna aǵynan jaryla alǵysyn bildire otyryp: "Men ol kúndi ekinshi týǵan kúnim desem bolady. О́lip qaıta tirilgendeımin. Osy sátte Erjan syndy batyl aǵamyz bolmaǵanda, o dúnıelik bolar edik. Bizge ekinshi ómir syılaǵan aǵalaryma Alla rızashylyǵy úshin shyn júrekten alǵysymdy bildiremin", – deıdi Nurjan.
Al, ekinshi jigit – Asqar Qaınazarov áli de aýrýhanada jatyr. Ol da esin jıǵan, sóıleı alady. Biraq aýrýhanadan shyǵýǵa erte, áli de álsiz. Ony da kórýge Erjan birneshe ret barǵan, biraq palataǵa jibermeıdi. Sondyqtan onyń baýyry Ysqaq arqyly hal-jaǵdaıyn bilip turady.
"Azamattarymyz aman bolsa eken. Asqardyń da tez aıyǵyp, qatarǵa qosylýyn tileımin. Nurjan aýrýhanadan shyqqanda qatty qýandym. Týystary, áriptesteri kelip, bárimiz birge qýanyp, shyǵaryp aldyq. Endi Asqardy da osylaı qýanyshpen shyǵaryp alatyn kún tez jaqyndasyn. Bárimiz de onyń densaýlyǵy úshin duǵada otyrmyz", – deıdi Erjan.
Syn saǵatta esh oılanbastan, óz ómiriniń qaýpine qaramaı, qutqarýǵa umtylǵan Erjan Ábdirazaqovtyń isi úlken erlik, asqan adamgershilik, deıdi ujymdastary maqtanyshpen.
Almaty