Búgin óńirlik kommýnıkasııalar alańynda ótken baspasóz konferensııasynda Almaty qalasynyń ákimi Baqytjan Saǵyntaev megapolıstegi koronavırýs jaǵdaıyna baılanysty túsinikteme berdi. Baqytjan Saǵyntaev Úkimet belgilegen barlyq sharalardyń oryndalyp jatqanyn aıtty, - dep habarlaıdy Egemen.kz
Qala ákimi Baqytjan Saǵyntaev qaladaǵy jaǵdaıdy turaqtandyrý úshin keshendi jumystar júrgizilip jatqanyn habarlady. Osylaısha, aýyrǵan adamdardyń em alýlary úshin qosymsha jatatyn oryndar qoryn qurý, zerthanalardyń ótkizý múmkindigin ulǵaıtý, stasıonarly aýrýhanalardy qajetti quraldarmen qamtamasyz etý jáne dárihanalarda dári-dárimektiń bar-joǵy men baǵalaryna monıtorıng júrgizilýde.
Búgingi jaǵdaıdy jáne juqtyrý boljamdaryn eskere otyryp, dárigerlerdiń, orta jáne kishi býyn medısınalyq qyzmetkerleriniń qosymsha brıgadalary quryldy. Biliktilikti arttyrýdyń onlaın-kýrstary ótkiziledi. Qalada volonterlerdi qosymsha qabyldaý jáne qajet bolǵan jaǵdaıda beıindi emes medıkterdi tez qaıta oqytý júzege asyrylady.
"Búgingi tańda Almaty qalasy boıynsha epıdemıologııalyq jaǵdaı kúrdeli, biraq baqylaýda. Bizde Almaty qalasy aýmaǵynda koronavırýstyń taralýynyń aldyn alý jáne oǵan qarsy áreket etý boıynsha jasalǵan is-sharalar jospary bar, ony biz baqylap otyrmyz", - dedi Baqytjan Saǵyntaev.
Qala ákimi onlaın brıfıng ótkizip jatqan kezde Almatyda indet juqtyrǵandardyń naqty sany – 6202-ge jetip, koronavırýstiń kún saıynǵy órshýi 1,1 paıyzdy qurady. Bul kúnderi ınfeksııalyq stasıonarlarda 1772 adam emdelip jatyr. Megapolıstegi naýqastardyń 349-ynyń jaǵdaıy aýyr bolsa, 24-i hál ústinde. 1264 naýqastyń densaýlyǵy ortasha dep baǵalansa, 135 adam táýir bolyp keledi. Degenmen, jaǵdaıy qıyn jáne aýyr pasıentterdiń sany artyp barady. О́z kezeginde pnevmonııa keseline shaldyqqan almatylyqtar qatary kúrt kóbeıgen. О́tken jyldyń osy ýaǵymen salystyrǵanda tynys joly aýrýlarynan kóz jumǵandar sany 68,6 paıyzǵa ósipti.
ALMATY