IT men kreatıvti ındýstrııaǵa basymdyq bere otyryp, qala ekonomıkasynda "qurylymdyq manevrdi" damytý úshin ınfraqurylymdyq jobalardy júzege asyrmaqpyz. Buǵan jeke kapıtal da qatystyrylady. Bul týraly Almaty qalasynyń ákimi Baqytjan Saǵyntaev óziniń Instagram-daǵy paraqshasyna jazdy, dep habarlaıdy Egemen.kz
"Búgin Almaly aýdanynda IT men kreatıvti hab qurý jobasynyń iske asyrylý barysymen tanystym. Investor Jambyl Revshanov tehnologııalyq kreatıvti kompanııalar úshin aýdany 9 myń sharshy metr jáne aýdany 4 myń sharshy metr ONE Academie Informatique bilim berý ortalyǵy úshin keńse keńistiginiń qurylysyn júrgizýde", deıdi Baqytjan Saǵyntaev.
Baqytjan Saǵyntaevtyń aıtýynsha, bilim berý ortalyǵy jobasy fransýz baǵdarlamashysy, pedagog Nıkolıa Sadırak jáne 01 educational platform-men yntymaqtastyqta júzege asady.
"Onyń biregeıligi sol baǵdarlamalaý, derekterdi taldaý, mashınalyq oqytý algorıtmderi, kıberqaýipsizdik, qosymshalardy ázirleý oqytýshysyz jáne dáristersiz júrgiziledi. Jasóspirimder praktıkalyq máselelerdi sheshýmen qatar, IT negizderin ózdiginen úırenip, bul salaǵa endi kelgenderge kómektesedi. 1,5-2 jyldyń ishinde 18-42 jas aralyǵyndaǵy 800-ge jýyq mamandy daıarlaý josparlanyp otyr", deıdi qala ákimi.