Tarbaǵataı memlekettik ulttyq tabıǵı parkiniń aýmaǵynda tuńǵysh ret qarsaq fototuzaqqa tústi. Qarsaq bolǵanda da, appaq. Júnderi úlpildep tur. Belden asyp kelip, beınekameranyń dál aldyna shoqıyp otyra qalysqan. Bir qarasań, qasqyr ma dersiń. Biraq bular – túlki týysyna jatatyn jyrtqysh.
Jyrtqysh bolǵanymen, iri janýarlarǵa tisteri bata qoımaıdy. Tasbaqa, jylan, kesirtke, tyshqan sekildi usaq janýarlardy qorek etedi. Keıde aýyl ishindegi taýyq qoraǵa da túsedi. О́zderi de asa iri emes. Dene turqy – 40-60 sm ǵana. Quıryǵynyń uzyndyǵy – 25-30 sm. Túlkiden aıyrmashylyǵy – qulaǵy aq, tumsyǵy súıir bolyp keledi. Bir qyzyǵy, park aýmaǵynda fotoǵa túsken qos qarsaq ta aqshyl. Jylyna eki ret túleıtinin eskersek, kóktemde qońyrqaı, qysqa qaraı júni aqshyl tartatyn shyǵar. Kóbinese shóleıtti jazyqty meken etedi. Buta-qaraǵan, jyńǵyl túbinen bes-alty metr in qazyp, sony panalaıdy. Borsyq, sýyrdyń inin de paıdalanyp ketedi. Qarsaq tez kóbeıgenimen, ómir súrýi tym kelte. Tabıǵı jaǵdaıda ári ketse bes-alty jyl ǵana ómir súredi. Jylyna bir ret kúshikteıdi. Bir kúshiktegende alty kúshikke deıin týady.
Tarbaǵataı memlekettik ulttyq tabıǵı parki qurylǵaly birinshi ret fotoǵa túskenin eskersek, jortyp júrgen qarsaq kóp emes. Qazirgi ýaqytta sanaq jumystary júrgizilip jatyr. Kóktemde jalpy ań sanynyń mólsheri belgili bolady. Aıta keterligi, ulttyq parktiń aýmaǵynda qarsaqty zańsyz aýlaǵan jaǵdaıda 5 aılyq eseptik kórsetkish (AEK) kóleminde, ıaǵnı 17 250 teńge aıyppul salynyp, jaýapkershilikke tartylady. Parktiń qarsaǵyna deıin qorǵalady.
Abaı oblysy,
Úrjar aýdany