Astana qalasynyń 25 jyldyq mereı toıyna arnalǵan «Jasaı ber, jaınaı ber, Astana!» atty alaman jyr jarysyna respýblıkamyzdyń túkpir-túkpirinen belgili jyr júırikteri bastap, jas talapkerler qostap 100 den asa aqyn qatysty, dep habarlaıdy Egemen.kz.
Táýelsizdiktiń altyn belgisi - Astanany jyrǵa qosyp, azattyqty jarqyrata ashý ońaı sharýa emes ekeni ekiniń birine belgili. Alaıda músháıra júldesinen úmitkerlerdiń kóp izdenip, kóp tolǵanǵany kóńil qýantady. Aqyndardyń kópshili Astanany jalań jyrlap, juqa oıdan ary asa almaǵany baıqalady. Alaıda «alýan-alýan júırik bar áline qaraı júgirer» degendeı Astanany ózinshe jyrlap, órnekti óleńderimen sýyryla shapqan talanttar kóp boldy.
Músháıraǵa túsken shyǵarmalardyń ishinde kólemdi dastandar da boldy. Konkýrs shartynda poema bolmaǵandyqtan ol shyǵarmalar qazylar alqasynyń talqysyna usynylmady.
Belgili qalamgerlerden quralǵan qazylar alqasy músháıraǵa qatysqan shyǵarmalardy suryptaı kele 12 aqynǵa báıge berdi.
QR Jazýshylar odaǵynyń hatshysy, Astana qalasy fılıalynyń dırektory, Qazaqstannyń eńbek sińirgen qaıratkeri, aqyn Dáýletkereı Kápuly qazylar alqasyna tóraǵalyq etti. Quramda Memlekettik syılyqtyń laýreaty, aqyn Nesipbek Aıtuly boldy. Nesipbek Aıtuly músháırany uıymdastyrýshy retinde tórt aı buryn jarııalanǵan músháıraǵa túsken óleńderdi qatań iriktep, dodaǵa túsken jyrlardyń baǵyt-baǵdaryn baǵamdady. Synı kózqaraspen iriktelgen jetpisten astam óleń qazylar alqasynyń talqysyna tústi. Qazylar quramynda QR Jazýshylar odaǵynyń múshesi, Mádenıet qaıratkeri, aqyn Suraǵan Rahmetuly, Fılologııa ǵylymdarynyń doktory, aqyn Baýyrjan Jaqyp, Qazaqstannyń eńbek sińirgen qaıratkeri, jazýshy Janbolat Aýpbaev boldy.
Sarapshylar barynsha syn kózben qarap, talǵam tarazysyna salyp, báıgege qatysqan ár óleńge kórkemdik turǵydan baǵa berip, ádilet bıiginen kórinýge tyrysty. Músháıra tól Astanamyzǵa arnalǵandyqtan óleńderdiń oılary tunyq, parasty bıik, mazmuny jan-jaqty bolýyn qadaǵalap, baǵa jetpes Táýelsizdik uǵymyn asqaqtata jyrlaýdy basty nazarda ustady.
Sonymen qazylar alqasy aqylǵa salyp, keńese kele bas báıgeni «Astananyń aspany» degen toptama óleńderi úshin belgili aqyn, Abaı atyndaǵy Memlekettik syılyqtyń laýreaty Ǵalym Jaılybaıǵa berýdi jón sanady.
Birinshi oryn jas aqyn, «Daryn» Memlekettik jastar syılyǵynyń laýreaty Arman Sherızattyń «Azattyq munarasy» atty óleńine berildi.
Ekinshi eki orynnyń biri qazaqtyń qabyrǵaly aqyny, Murat Shaımarannyń «Topyraq» atty toptama óleńderine buıyrdy.
Ekinshi orynnyń ekinshisi «Táýelsizdik kóshesiniń turǵyny» óleńi úshin belgili aqyn, Respýblıkalyq «Túrkistan» gazetiniń bas redaktory Baýyrjan Babajanulynyń qanjyǵasyna baılandy.
Úshinshi úsh oryn belgili aqyndar Dúken Másimhanulynyń «Astanam meniń aıbynym» óleńder toptamasyna, Elena Ábdihalyqovanyń «Astana. Bastaý» óleńder toptamasyna, Ábdiǵanı Bázilhannyń «Bógenbaıdyń Qaraótkeli» tolǵaýyna berildi.
Bes yntalandyrý syılyǵy Shyryn Tolqynova (Almaty oblysy) Ularbek Nurǵalym (Astana), Nazgúl Berdiqoja (Qyzylorda), Baqytjan Raısova (О́skemen), Baǵdat Múbárak (Almaty) qatarly aqyndarǵa buıyrdy.