Ippoterapııa eminiń ıgiligin qazir Qaraǵandyda 28 bala kórip otyr. «Bota» qoǵamdyq qaıyrymdylyq qory júzege asyryp otyrǵan jobaǵa memlekettik áleýmettik tapsyrys sheńberinde 11 mln teńge qarastyrylǵan. Osy arqyly erekshe balalar bir mezgil «Karat» jylqy zaýytynda at minip, serýen quryp, demalyp ta, em alyp ta júr. Qasıetti jylqy janýarynan qýat alyp júrgen mundaǵy balalardyń boıynan az ýaqyttyń ishinde aıtarlyqtaı serpilis seziledi.
Munda erekshe balalar aptasyna 3 márte kelip, ıppoterapııa emin qabyldaıdy. Kýrs jarty saǵatqa sozylady. Bilikti, sertıfıkaty bar mamandardyń nusqaýymen balalar at ústinde túrli qımyl-qozǵalys jasaıdy.
«Ippoterapııa emi balaǵa psıhoemosıonaldyq jáne bıomehanıkalyq turǵydan jaqsy áser etedi. Atqa minip, serýendeý – jarymjan bala úshin úlken jetistik. Jylqy júrisiniń terbelisi balanyń tirek-qozǵalys júıesine oń áser etedi. Muny mamandar rastaıdy. Ata-anasynyń nemese nusqaýshynyń kómegimen atpen serýendetý arqyly múmkindigi shekteýli balalardyń aıaq-qol motorıkasyn damytýǵa, at ústinde tepe-teńdikti saqtaý arqyly olardyń qımyl-qozǵalys úılesimin túzetýge bolady. Bizge kelip júrgen balalar alǵashqydaǵydaı emes, qazir shırap qaldy. Bul serebraldy sal aýrýyn, aýtızm, motorlyq jáne sóıleý áreketterin jaqsartady, sóıleý belsendiligin arttyrady», deıdi ıppoterapııa boıynsha nusqaýshy Móldir Rasýlova.
Aıta keteıik, Móldirdiń osy baǵytta jumys istep júrgenine 8 jylǵa jýyqtapty. Ol 9 aılyq balany da ıppoterapııa emine ákelgender bar ekenin aıtty. Muny maman quptap otyr. Balanyń belgili bir jasqa tolyp, dıagnozy anyqtalýyn kútip otyrǵansha, alǵashqy belgilerin baıqasańyz, birden jylqy ústinde jattyǵý jasatý kerek ekenine keńes beredi. Sonymen qatar Móldir paralımpıadalyq at sportyn damytyp júrgen jas maman retinde aımaqqa belgili. «Qabiletti balalardy baıqasaq, at sportyna baýlyp, nátıje shyǵaramyz», deıdi ol.
Dámıla Túsipova eki balasyn da ıppoterapııa sabaǵyna aparady. 11 jastaǵy Aıshabıbi esimdi qyzynan serebraldy sal aýrýy, al 10 jastaǵy Kerimnen týa bitken aýtızm dıagnozy anyqtalǵan.
«Naýryz aıynan bastap ıppoterapııamen aınalysamyz. Balalarym mazasyz bolatyn. Qazir oń nátıje baıqalady. Balalar sabyrly bola tústi. Qyzymnyń túzý otyrýy qıyndyq týdyratyn. Mine, bes aı ótti, sabaqtan qalmaımyz, sonyń nátıjesinde tepe-teńdikti, túzý otyrýdy úırendi. Ulym túnde mazasyzdanyp, áreń uıyqtaıtyn. Qazir uıqysy tynyshtaldy. Osyndaı múmkindik syılaǵan jandarǵa erekshe alǵys aıtamyz. Balalarym osynda kelemiz desek, qatty qýanady. Jylqyny jaqsy kóredi. Munda ınvataksıdiń kómegimen tegin qatynap turamyz. Bir kún buryn tapsyrys beremiz. Bul da úlken kómek bolyp tur», deıdi D.Túsipova.
Siz de balańyzdyń ıppoterapııa emin qabyldaǵanyn qalasańyz, onda joly op-ońaı. Tek tómendegideı qujattar tolyq bolsa boldy.
«Ippoterapııa qyzmetin qajet etseńizder, Qaraǵandy qalasynyń jumyspen qamtý jáne áleýmettik baǵdarlamalar bólimine ótinish, balanyń týý týraly kýáligi, múmkindigi shekteýli ekenin aıǵaqtaıtyn anyqtama jáne balaǵa ıppoterapııamen aınalysý qajettigi týraly dárigerlerdiń saraptamasy qajet. Eger ótinish kóbeıip, balalar sany arta tússe, qosymsha qarajat qarastyrylady», deıdi Qaraǵandy qalasynyń jumyspen qamtý jáne áleýmettik baǵdarlamalar bóliminiń sektor meńgerýshisi Gúljan Shaımardanova.
«Karat» jylqy zaýytynda ıppoterapııa emin júrgizetin sertıfıkaty bar tórt jattyqtyrýshy qyzmet kórsetedi. Alańdamańyz, balalardyń qaýipsizdigi qatań saqtalady. Bir balaǵa úsh maman qyzmet kórsetedi. Buǵan qosa arnaıy ıppoterapııa úshin jýas úsh jylqy tańdalyp alynǵan.
At ústinde otyrǵan adamnyń barlyq bulshyq eti qozǵalysta bolady. Tepe-teńdikti saqtaý úshin salt mingen adam boıyn jınaýǵa, óziniń árbir dene qımylyn ıgerýge jattyǵady. Al erekshe balalarǵa eń keregi de osy jattyǵý. Bir sózben aıtqanda, jylqy – tabıǵı trenajer.
Qasymhan ǴALYM,«Egemen Qazaqstan»