Máskeýdiń Tústi metaldar jáne altyn ınstıtýtyn támamdaǵannan keıingi eńbek jolyn Jezqazǵan jerindegi «Pokro» shahtasynda bastaǵan Kákimbek Salyqov naq osy óńirde tulǵa bolyp qalyptasty. Shahtada basshy boldy, keıin basshylyq qyzmetke aýysty. Jezqazǵan ken-metallýrgııa kombınatynyń partkom hatshysy, qalalyq partııa komıtetiniń birinshi hatshysy qyzmetterin atqardy. Oblystyq partııa komıtetiniń ekinshi hatshysy qyzmetinde júrgende KOKP OK-ǵa ınspektor bolyp qyzmet aýystyryp, keıin Qaraqalpaq obkomynyń birinshi hatshylyǵyna saılandy.
Kákimbek Salyqov memleket jáne qoǵam qaıratkeri bolýmen qatar aqyn, kompozıtor edi. Ol halqyn, elin, Otanyn jyrlaýdan jalyqpady. Ásirese Jezqazǵandy, onyń adamdaryn jyrǵa qospaǵan kezi joq. Kákeńniń «Jezkıigi» kúlli qazaqtyń júregine jaqyn ánge aınaldy. Ol Jezqazǵan – Ulytaý óńiri halqynyń maqtan tutatyn aıdarly azamattarynyń biri edi.
2021 jyly Sátbaev qalasyndaǵy Aqsaqaldar alqasy Kákimbek Salyqovtyń esimin máńgi este qaldyrý maqsatynda qandaı qurmet kórsetý jóninde bas qosyp, aqyldasty. Qalada jańadan salynyp jatqan Oqýshylar saraıyna esimin berý týraly usynys ta boldy. Biraq aqsaqaldar aqyldasa kele qaladaǵy P.Shatalıýk kóshesin Kákimbek Salyqov kóshesi dep ataý oryndy degenge toqaılasty. Munyń da jóni joq emes-ti. О́ıtkeni K.Salyqov kezinde Jezqazǵan kentinde turǵan bolatyn. Al keıingi jyldary bul kenttiń turǵyndary tolyqtaı kóshirilip, solardyń basym kópshiligi P.Shatalıýk kóshesine qonystanǵan edi. Jáne bir jaǵynan P.Shatalıýk ýaqytynda «stahanovshy» atanǵany bolmasa, memlekettik marapattar ıelene qoımaǵan kisi bolyp shyqty.
Aqsaqaldardyń bul usynysy qala basshylyǵyna jetkizilip, odan ári tıisti talaptarǵa saı, naqtyraq aıtqanda, 2022 jylǵy 2 qyrkúıekte qoǵamdyq tyńdaý ótkizilip, qabyldanǵan sheshimder jóninde jergilikti buqaralyq aqparat quraldary, áleýjeli arqyly elge jarııa etildi. Barlyq qajetti qujattar jınaqtalǵan soń oblystyq onomastıkalyq komıssııaǵa jetkizý úshin «Ulytaý oblysynyń mádenıet, tilderdi damytý jáne arhıv isi basqarmasy» memlekettik mekemesine joldandy. Oblystyń endi qurylyp jatqany áser etken bolý kerek, atalmysh qujat birshama ýaqyt qozǵalyssyz jatyp qalǵanǵa uqsaıdy. Buǵan Sátbaev qalalyq mádenıet jáne tilderdi damytý bóliminiń basshysy Q.Tóleshtiń 2022 jylǵy 28 jeltoqsanda «Ulytaý oblysynyń mádenıet, tilderdi damytý jáne arhıv isi basqarmasy» memlekettik mekemesiniń basshysy Á.Omardyń atyna joldaǵan haty dálel. Munda ol ózderi joldaǵan Usynystyń respýblıkalyq onomastıkalyq komıssııaǵa usynylǵan-usynylmaǵanyn naqtylap berýdi ótinedi. Buǵan Á.Omar 2023 jylǵy 10 qańtar kúni «Ulytaý oblysynyń mádenıet, tilderdi damytý jáne arhıv isi basqarmasy sizdiń Sátbaev qalasynyń Pavel Shatalıýk kóshesine Kákimbek Salyqovtyń esimin, Gornıaskaıa kóshesine Pavel Shatalıýktiń esimin berý týraly hatyńyz boıynsha qujattar Qazaqstan Respýblıkalyq Úkimetiniń janyndaǵy Respýblıkalyq onomastıka komıssııasynyń qaraýyna joldanǵanyn habarlaıdy» degen resmı jaýap qaıtarady. Mine, sodan beri segizinshi aıǵa ketip barady, biraq áli eshqandaı naqty jaýap joq. Aqsaqaldar alańdaýly. Kóbisi keshe ózderi kózderin kórgen Kákeńniń atyndaǵy kósheniń ashylý saltanatyn tamashalaǵysy keletini túsinikti ǵoı. Biraq birer túsiniksizdikter bar. Birinshiden, Respýblıkalyq onomastıkalyq komıssııa oblys tarapynan joldanǵan usynysqa nege jaýap qaıtarmaıdy? Ekinshiden, bıyl maýsymnyń 22-sinde respýblıkalyq buqaralyq aqparat quraldarynda elimiz boıynsha 69 kósheniń jańasha ataýǵa ıe bolatyny týraly jarııalandy. Sol 69-dyń biri bolýǵa Kákimbek Salyqov ábden-aq laıyqty emes pe edi? Nege sol tizimge enbeı qaldy eken?
– Biz respýblıkalyq onomastıkalyq komıssııanyń sheshimin taǵatsyzdana kútip júrmiz. О́ıtkeni Kákeń – eshqandaı talas týdyrmaıtyn tulǵa. Usynys barlyq talaptarǵa sáıkes jasaldy. Qazir Qanysh Imantaıuly Sátbaevtyń esimin ıelengen bizdiń qalamyz óziniń jartyǵasyrlyq mereıtoıyna daıyndyq ústinde. Osy mereıtoı qyrkúıektiń 13-inde keń kólemde atalyp ótilmek. Sol kúngi mereıtoılyq is-sharanyń biri Kákimbek Salyqov kóshesiniń saltanatty ashylýy bolsa eken degen tilegimiz bar, – deıdi QR eńbek sińirgen energetıgi, Sátbaev qalasynyń Qurmetti azamaty Jaıyq Muńsyzbaev.
Bul tek jalǵyz Jaıyq aqsaqaldyń ǵana armany emes...