Búgin kezekten tys Prezıdent saılaýyna bir jyl tolyp otyr. Osyǵan baılanysty memleket jáne qoǵam qaıratkerleri óz oılarymen bólisip jatyr. Feısbýktegi paraqshasynda Májilis tóraǵasy Erlan Qoshanov saılaý qarsańynda Memleket basshysynyń jeke tulǵasyna degen halyqtyń erekshe yqylasy, shynaıy qurmeti aıqyn kóringenin atap ótti.
– Halyqtyń oń ózgeristerge degen seniminiń berik ornyqqanyna kóz jetkizdik. О́zgerister halyqtyń úmitin oıatty, rýhyn kóterdi. Sondyqtan azamattarymyz memlekettiń, eldiń bolashaǵy úshin qapysyz tańdaýyn jasady. Halyqtyń ol úmiti men senimi negizsiz emes bolatyn. Bul 2019 jyly bastalǵan Qasym-Jomart Toqaevtyń túbegeıli saıası reformalarynyń nátıjesi ekeni aqıqat. Osy oraıda, Ádiletti Qazaqstan qurý ıdeıasy ádildikke, adaldyqqa, ózgeriske shólirkep otyrǵan qoǵam suranysynyń údesinen shyqty dep senimmen aıta alamyz, – dedi Májilis spıkeri.
Erlan Qoshanov bul baǵytta Memleket basshysy tabandy, batyl qadamdar jasaǵanyna toqtaldy. Konstıtýsııanyń úshten biri jańardy, Qazaqstannyń qazyna-baılyǵy halyqtyń menshigi dep tanyldy, Prezıdent ókilettigi bir merzimmen shekteldi, bılik ınstıtýttary tolyqtaı jańǵyrdy, Parlamentke alty birdeı saıası partııanyń ókilderi kirdi, shynaıy azamattyq qoǵamnyń irgesi bekemdelip jatyr, Prezıdent jańa ekonomıkalyq baǵdar usyndy. Palata tóraǵasy osynyń bári Memleket basshysynyń aıtqan «ádiletti memleket – ádiletti ekonomıka – ádiletti qoǵam» formýlasynyń naqty oryndalýyna alǵyshart bolǵanyna nazar aýdardy.
– Prezıdent qoǵamda zań men tártiptiń múltiksiz saqtalýy kerektigin únemi aıtyp keledi. Zań men tártip ústemdik qurǵan kezde ǵana Qazaqstandy ádiletti, baqýatty elge aınaldyra alamyz. Bul óz qolymyzda. Árıne, ol joldyń ońaı bolmaıtyny túsinikti. Qazirgideı aýmaly-tókpeli zamanda osy maqsat-mindetke eldiń birligi men berekesi arqyly ǵana jete alamyz. О́tken jylǵy Prezıdent saılaýy osyny kórsetti. Sol saılaýda Qasym-Jomart Kemelulynyń tóńiregine el bolyp, ult bolyp uıystyq. Barlyq qoǵamdyq kúshter bir týdyń astyna – bir koalııasııaǵa biriktik. Uly murat jolynda alǵan baǵytymyzdan taımaıtynymyzdy dáleldedik. El múddesi bárinen bıik, ult bolashaǵy bárinen qasterli. Osy baǵytta judyryqtaı jumylsaq qana barlyq synaqtan súrinbeı ótemiz, – dedi E.Qoshanov.