Keshe Astanadaǵy Dostyq úıinde Memlekettik syılyqtyń laýreaty, Qazaqstannyń eńbek sińirgen qaıratkeri Ulyqbek Esdáýlet pen Qyrǵyz Respýblıkasynyń Halyq aqyny, Toqtaǵul atyndaǵy Memlekettik syılyqtyń laýreaty, Qazaqstannyń mádenıet qaıratkeri Akbar Rysquldyń «Egiz eldiń eki aqyny» atty birlesken shyǵarmashylyq keshi ótti.
Ulyqbek Esdáýlettiń kezinde aıtqan «Búkil álemniń aqyn-jazýshylary – bir ulttyń adamdary sekildi» degen qanatty sózi bar. Álemniń talaı elinde bolyp, aqyn-jazýshylarymen kezikken, olarmen dostyq qarym-qatynas ustap kele jatqan, talaı halyqaralyq ádebı basqosýlarǵa qatysqan, ózi Túrki elderiniń halyqaralyq jazýshylar uıymynyń tóraǵasy bolyp qyzmet etetin aǵamyzdyń bul sóziniń shyndyǵy Astana tórinde ótken osy birlesken shyǵarmashylyq keshte taǵy bir qyrynan jarqyrap kóringendeı boldy. Shyǵarmashylyq keshke Túrikmenstannyń Qazaqstandaǵy Tótenshe jáne ókiletti elshisi Batyr Redjepov, Reseı Federasııasy Saha Respýblıkasy Jazýshylar uıymynyń tóraǵasy Gavrıl Androsov bastaǵan delegasııa jáne óz elimizdiń zııaly qaýym ókilderi qatysyp, halyqtar dostyǵyn taǵy bir áıgilep qana qoımaı, oryndy oıdyń órisin ushqyndata otyryp, osy basqosýǵa ıntellektýaldyq sıpat berdi.
Dóńgelek ústel basyndaǵy úlken basqosýdy júrgizgen Qazaqstan jazýshylary Astana bólimshesiniń basshysy, belgili aqyn Dáýletkereı Kápuly Qyrǵyzstan prezıdenti Sadyr Japarovtyń Qazaqstanǵa kelgen sapary aıasynda qazaq-qyrǵyz halyqtary arasyndaǵy rýhanı-mádenı baılanystardyń odan ári bekı túskendigin, keshe ǵana elordamyzda esimi ǵasyrdan-ǵasyrǵa jalǵasqan qyrǵyzdyń áıgili epostyq batyry Aıkól Manas eskertkishiniń boı kótergenin aıta kele, eki el jazýshylary arasyndaǵy Áýezov pen Aıtmatov áıgilep ketken jarqyn dostyqtyń búgingi tańda jańa qyrynan jalǵasqandyǵyn, sonyń erekshe bir belgisi «Egiz eldiń eki aqyny» atalyp otyrǵan Ulyqbek Esdáýlet pen Akbar Rysquldyń búgingi birlesken shyǵarmashylyq keshi ekenin atap kórsetti.
Basqosýda birneshe elden kelgen qaıratkerler men qalam ıeleri sóılep, ózderiniń halyqtar dostyǵy, túrik halyqtarynyń baýyrlastyǵy týraly keleli oı-pikirlerin ortaǵa saldy.
Túrikmenstan elshisi Batyr Redjepov Ulyqbek Esdáýlet pen Akbar Rysqul shyǵarmashylyǵyna erekshe yqylas tanytatynyn aıta kele túrikmenniń uly aqyny Maqtymqulynyń shyǵarmashylyǵy qazaq elinde qandaı qurmetke ıe bolsa, qazaqtyń uly aqyny, oıshyly Abaı esimi de túrikmender arasynda sonshama qurmetteletinin jetkizdi.
Parlament Senaty Áleýmettik-mádenı damý jáne ǵylym komıtetiniń tóraǵasy Nurtóre Júsip baýyrlas eki eldiń áıgili aqyndary arasyndaǵy mundaı úndestiktiń halyqtar dostyǵyna ólsheýsiz úles qosatyndyǵyn aıta kele, bul basqosýdy erekshe shyǵarmashylyq kesh dep baǵalady.
Sondaı-aq basqosýda sóz alǵan Saha Respýblıkasy Jazýshylar uıymy tóraǵasynyń orynbasary, halyq jazýshysy, Iаkýtııa Memlekettik syılyǵynyń laýreaty Natalıa Harlampeva, Reseıge belgili jazýshy-romanshy Nıkolaı Lýgınov, «Iаkýtııa» kitap baspasynyń dırektory, aqyn, aýdarmashy Zınaıda Arhıpova óz sózderinde qazaq-saha aqyn-jazýshylary arasyndaǵy shyǵarmashylyq baılanystyń sońǵy kezderi jaqsy damı bastaǵandyǵyn, sonyń belgisindeı Ulyqbek Esdáýlettiń saha tilinde «Balbal tastar tili» kitabynyń, belgili jazýy Álibek Asqarov shyǵarmasynyń jaryq kórip, Astanada ótip jatqan Halyqaralyq kitap kórme-jármeńkesi aıasynda olardyń tanystyrylymy tabysty ótkendigin aıtty. Sol sekildi Nıkolaı Lýgınovtiń saha tilindegi bir myń bettik «Shyńǵys han» romany osydan biraz buryn qazaq tiline aýdarylyp jaryq kórgen bolatyn.
Belgili manasshy, aqyn Baıanǵalı Álimjanov Ulyqbek Esdáýlet pen Akbar Rysqulmen alǵash tanysqan kezderi týraly ádemi estelikterin aıta kele qyrǵyz tilindegi «Manas» eposynan úzindilerdi jatqa soqsa, qazaqtyń ánshi qyzy Baǵdat Sámedınova Akbar Rysquldyń sózine jazylǵan qyrǵyz ánin syzylta shyrqady.
Belgili qalamger Aıgúl Kemelbaeva eki aqynnyń shyǵarmashylyǵy týraly oılaryn ortaǵa saldy.
Dóńgelek ústel basynda sóz sóılegen egiz eldiń eki aqyny Ulyqbek pen Akbar ózderiniń osydan shırek ǵasyr buryn alǵash qalaı tanysqandyqtaryn eske alyp, sodan beri izi sýymaı kele jatqan dostyqtary týraly qazirgi qazaq, qyrǵyz, jalpy túrik ádebıeti arasyndaǵy týysqandyq baılanystar týraly áńgime qozǵady. Qyrǵyzstannyń Qazaqstandaǵy Tótenshe jáne ókiletti elshisi qyzmetin atqaryp, Astanada biraz jyl turǵan Akbar Rysqul bul qalanyń ózine óte ystyq ekendigin jetkizdi. Eki aqyn da jyly-jyly estelik aıtyp, óleńderin oqydy.
Eki aqyn men shetelden kelgen qonaqtarǵa Dostyq úıiniń tarapynan qurmet kórsetilip, syı-sııapat jasaldy.
Birlesken shyǵarmashylyq kesh Ulyqbek Esdáýlettiń sózine jazylǵan «Áı, Perızat!» ániniń oryndalýymen aıaqtaldy.
Suńǵat ÁLIPBAI