Qaraǵandylyqtar oblystyq polısııa departamentiniń tárbıe jáne kadr jumysy basqarmasynyń erekshe tapsyrmalar jónindegi aǵa ınspektory, polısııa maıory Qýanysh Medeýbaevty áýeli aqyn retinde tanıdy, odan keıin baryp pogon taqqan polıseı retinde biledi.
Olaı bolatyn da jóni bar. Qýanysh Abdollaulynyń alǵashqy óleń jınaǵy ýnıversıtette júrip jaryqqa shyǵady. «Jan-Arym» ataýymen. Professor Nurlan Dýlatbekovtiń tikeleı qoldaýymen. Sóıtip, Qaraǵandydaǵy ádebı ortaǵa osylaı qadam basady.
Aragidik «Ortalyq Qazaqstan», «Balqantaý» gazetterine qoǵamdaǵy ózekti taqyryptarǵa ótkir toqtalyp, óziniń oı-tolǵaýlaryn jazyp turdy. Jany jazýdy jaqsy kórgendikten, jýrnalıst bolǵysy kelgen armany basqasha oryndalady. 2014 jyly oblystyq polısııa departamentiniń baspasóz qyzmetine jumysqa qabyldanady. Sonda júrip polısııa qyzmetkerleriniń qyzyǵy men shyjyǵyn, quqyq qorǵaý organyndaǵy jylt etken jańalyqtardy óńirdegi gazet betterinde kórsete bildi. Oblystyq «Saryarqa» telearnasyndaǵy «Zań jáne zaman» baǵdarlamasy arqyly da halyqqa organdaǵy ómirdiń qyr-syryn jetkizip júrdi.
Baspasóz salasyndaǵy jumystardy urshyqsha ıirip, utymdy uıymdastyra bilgen qyzmetker 2019 jyly departamenttiń ıdeologııa men ımıdjine jaýapty Tárbıe jáne kadr jumysy basqarmasyna aýysady. Bul basqarmadaǵy sharýa da Qýanysh Abdollaulyna asa tańsyq emes. Osynda júrip erekshe tapsyrmalar jónindegi aǵa ınspektor laýazymyna deıin joǵarylaıdy, qazir maıor sheninde.
Munda qandaı qyzmet atqarady? Departament qyzmetkerleriniń, ıaǵnı ár polıseıdiń patrıottyq rýhyn kóterý maqsatynda túrli mádenı is-sharalar uıymdastyrady. Máselen, erlik kórsetken qyzmetkerlerdiń batyldyqtaryn nasıhattap, úlgi etedi. Ishki ister organynyń ardagerlerimen «Erlik sabaqtaryn» ótkizedi. Iаǵnı jas polıseılerge olardyń dańqty joldaryn úlgi etedi. Únemi teatr, kınoteatr sekildi basqa da mádenı uıymdarmen birlese jumys isteıdi. Rýh kóteretin qoıylymǵa, kınoǵa barýyn uıymdastyrady. Bylaısha aıtqanda, ár polıseıdiń ımıdjine jaýapty.
«Aqyn úshin polıseı bolý ájepteýir aýyr. Áıtpese, qarapaıym polısııa qyzmetkeri bolsań bar kúsh-jigerińdi aıanbaı jumysqa arnaısyń. Aqyn retinde óz shyǵarmashylyǵyńa erkindik berý múmkindigi sál aýyrlaý. Dese de basshylyq únemi qoldaý kórsetip, shyǵarmashylyǵyma erkindik berip turady. Nátıjesinde, polısııaǵa degen halyqtyń oń kózqarasyn qalyptastyrýǵa birneshe óleń, patrıottyq baǵyttaǵy ánderge sózder jazyldy. Beınerolıkter men derekti fılmder túsirildi. Ol, árıne, jalǵyz meniń eńbegim emes. Departamenttegi «Eńbek jáne erlik dańqy» mýzeıiniń dırektory Aıjamal Bekishqyzy men baspasóz qyzmeti salasyndaǵy áriptes dostarymnyń arqasynda», deıdi Qýanysh.
Osydan on jyl buryn aqyn Dáýren Berikqajyulynyń qoldaýymen «Qara jáshik» atty kitaby jaryqqa shyǵyp, ony ádebı orta jyly qabyldady. Al oqyrmannan oń baǵa alady. Syrshyl óleńderi ıspan, túrik, fransýz, ázerbaıjan tilderine aýdarylyp, qazaq aqyndarynyń ujymdyq antologııasyna engen. Ispan halqynyń ǵana emes, álem aqyny atanǵan Hoste Horhe Padron «Álemdegi 30 eldiń aqyndarynyń ishinde polısııa qyzmetinde júrgen aqyndy birinshi ret kezdestirdim», degen pikir bildirip, poezııasyna bas barmaqpen baǵa beripti.
Odan bólek, Qýanysh Abdollauly birneshe ánge sóz jazǵan. «Jasaı ber, Qazaqstan», «Anashym», «Arý qalqa qyz» sekildi ánderi eldiń aýzynda keń taraǵan.
Munymen qosa aqyn polıseı tórt ul, úsh qyzdyń ákesi. Demek jubaıy Jadyra Serikbekqyzynyń azamatynyń jaǵasyna kir, kóńiline kirbiń túsirmeı, qoldaýy da úlken sharýa. Jadyra janyna jaqyn kásippen, ıaǵnı tiginmen aınalysady. Tapsyryspen perde tigip, otbasynyń tabysyn eselep otyr. Aqyn Qýanysh «Balalarym – kóz qýanyshym, kóńil nurym. Jumystan shyǵa solarǵa asyǵamyn. Jalpy alǵanda óleńde de, ómirde de armany oryndalǵan janmyn», deıdi. Olaı bolsa, biz de Qýanysh úshin qýanyshtymyz.
Qaraǵandy oblysy