Mıras Baıjigit – aýyl sharýashylyǵyndaǵy sıfrlyq revolıýsııaner. Onyń iGPS Tech startapy búginde Qazaqstannyń túkpir-túkpirinde 100 myńnan astam jylqyny baqylaýǵa múmkindik beredi. Barlyǵy kishkentaı inisin GPS saǵattary arqyly qadaǵalaýdan bastalǵan
Barlyǵy baýyryn baqylaýdan bastalǵan
Mıras Qostanaı oblysynyń Arqalyq qalasynda dúnıege kelgen. Sol jerde qazaq-túrik lıseıin bitirip, Astana medısınalyq ýnıversıtetine grantqa túsken. Keıipkerimiz bala kezinen adamdarǵa kómektesýge yntyq bolypty. Birde anasy dekrettik demalysqa shyqqannan keıin, ony mektepke aparyp, alyp kelý jumysy aǵasyna júkteledi.
«Inimniń qaıda júrgenin bilgim keldi. Ýaıymdaıtynmyn. Sol kezde GPS saǵattaryn satyp alyp, oǵan syıǵa tarttym. Bul shynymen ata-analar úshin keremet sheshim eken. Saǵat arqyly onyń qaıda júrgenin baqylap, tipti qajet kezde qońyraý shalýǵa bolatyn. Osydan keıin men basqa ata-analar da mundaı qurylǵyǵa qyzyǵatynyn túsindim», deıdi Mıras.
Jylqyǵa GPS ornatty
Mırastyń bıznes joly dál osy GPS saǵattardan bastaldy. Instagram arqyly satýdy uıymdastyryp, aıyna 300 myń teńgege deıin tabys tapty. Biraq onyń ómirin ózgertken bir suraq boldy.
«Bir kúni klıentim: «Balalardy baqylaýǵa bolady, al jylqylardy she?» dep surady. Sol kezde oılanyp qaldym. Jylqylar elimizdiń ushy-qıyry joq dalasynda jaıylady, al ol jerlerde uıaly baılanys joq. Mundaı jaǵdaıda olardy qalaı baqylaıdy? – dep oılanypty Mıras.
Bul suraq onyń jańa ıdeıasynyń bastaýy boldy. Ol fermerlermen kezdesip, olardyń máselelerin túsindi. Jylqylar jıi joǵalyp ketedi, joldarǵa shyǵyp, apatqa sebepshi bolady nemese egistik alqaptaryn taptaıdy. Sondyqtan fermerlerge janýarlardy baqylaýdyń mańyzdylyǵyn túsingen.
Otandyq ónimdi iske qosty
Alǵashqy kezde Mıras pen onyń seriktesi Maqjan Ikram sheteldik GPS trekerlerin paıdalandy. Biraq fermerlerdiń qajettilikteri men usynystaryn tyńdaı otyryp, olar ózderiniń qosymshasyn jasaýǵa kiristi.
«Alǵashqy qosymshamyz óte qarapaıym boldy. Jylqylardyń ornalasýy men olardyń qozǵalys tarıhy ǵana kórsetildi. Biraq fermerler bizge «jel kartasyn» qosýdy surady. Sebebi jylqylar jelge qarsy nemese jel baǵytymen júretinin baıqadyq. Biz bul fýnksııany qosyp, fermerlerdiń senimine ıe boldyq», deıdi Mıras.
Júıe qazir fermerlerge kelesi múmkindikterdi usynady:
• Topografııalyq jáne spýtnıktik kartalar – maldyń naqty ornalasýyn kórýge bolady.
• Jel kartasy – jylqylardyń qozǵalysyn boljaýǵa kómektesedi.
• Geosharbaqtar – paıdalanýshylar maldyń júretin aýmaǵyn belgileı alady. Eger jylqy bul aýmaqtan shyqsa, qosymsha habarlama jiberedi.
«Ádette bir trekerdi tabynnyń jetekshisine nemese bıesine ornatady. Bul úıirdi baqylaýǵa múmkindik beredi. Bir fermer: «Men endi jylqylarymdy joǵaltamyn dep alańdamaımyn. Senderdiń júıeleriń kóńilimdi tynshytty» dep aıtty. Budan artyq ne kerek? Bizge osyndaı pikirler shabyt beredi», deıdi Mıras.
Aıyna 20 mıllıon teńge
Búgingi tańda iGPS Tech júıesi arqyly Qazaqstan boıynsha 100 myńnan astam jylqy baqylanady. Fermerler jylqylarynyń qaıda ekenin, qaı jaqqa bet alǵanyn naqty biledi. Jylqylardy baqylaý arqyly kompanııa aı saıyn 20 mıllıon teńge tabys tabady, onyń 5 mıllıony – taza paıda.
«Bizdi fermerlerdiń senimi alǵa jetelep keledi. Olar óz tájirıbesimen bólisedi, al biz olardyń problemalaryn sheshýge tyrysamyz. Jylqylardy baqylaý – bul jaı ǵana bıznes emes, bul – adamdardyń ómirin jeńildetý», deıdi Mıras.