Kórnekti jazýshy, tarıhshy, etnograf, folklorshy Zeınolla Sániktiń 90 jyldyq mereıtoıyna oraı uıymdastyrylǵan «Sóz ǵumyr» atty respýblıkalyq jastar saıysy ótti.
Z.Sánik atyndaǵy mádenıet qory jáne Shakarim University birlese ótkizgen dástúrli saıysqa elimizdiń joǵary oqý oryndarynan 20 bilim alýshy qatysty.
«Zeınolla Sánik taǵylymy» atty jyr músháırasy, Zeınolla Sániktiń tarıhı shyǵarmalarynan kórkemsóz oqý saıysy jáne «Sóz zergeri – Zeınolla Sánik» taqyrybynda esse jazýdan synǵa túsken jastardyń bilimderi men shyǵarmashylyqtaryna qordyń atqarýshy dırektory Serik Qalıev, ál-Farabı atyndaǵy Qazaq ulttyq ýnıversıtetiniń professory Anarbaı Buldybaı bastaǵan ǵalym, oqytýshylar qazylyq etti.
«Saıysqa elimizdiń túkpir-túkpirinen talapty, talantty stýdentter qatysyp otyr. Zeınolla Sánik búkil sanaly ǵumyryn baspa salasyna, el murasyn jınaýǵa arnady. Sońǵy demi úzilgenshe qolynan qalamy túspegen qarymdy qalamger. Jyl saıyn dástúrli túrde ótkizilip kele jatqan saıys bıyl jazýshynyń 90 jyldyq mereıtoıyna arnaldy. Sondyqtan bul baıqaýdyń bási bıik. О́ıtkeni ár oqý ornynan tek bir ǵana úmitker qatysyp, músháıra, kórkemsóz oqý jáne esse jazý syndy úsh atalym boıynsha baq synap otyr», dedi aqyn Serik Qalıev.
Saıys barysynda stýdentter bilimderi men daıyndyqtaryn joǵary deńgeıde kórsete bildi. Sonymen, tartysty báıgeniń bas júldesin M.Qozybaev atyndaǵy Soltústik Qazaqstan ýnıversıtetiniń stýdenti Nuraı Qalıhanova jeńip aldy. I orynǵa S.Amanjolov atyndaǵy Shyǵys Qazaqstan ýnıversıtetiniń stýdenti Bekarys Sekenov laıyq dep tanyldy. Mádenı is-shara aıasynda Abaı kitaphanasynda «Ulttyq qundylyq. Qazaq etnografııasy jáne jazýshy, etnograf Zeınolla Sánik – 90 jyl» atty respýblıkalyq ekspedısııa múshelerimen kezdesý uıymdastyrylyp, ǵalymdar Shakarim University-niń stýdentterine «Tabysty tulǵanyń dárisi» atty leksııa oqydy.
Abaı oblysy