«Meloman» kompanııasy ókilderiniń aıtýynsha, prokattyń alǵashqy demalys kúnderinde qazaq tilindegi «Aladdın» ertegisin kórermenderdiń rekordtyq sany, ıaǵnı úsh myńnan astam adam tamashalapty. Atalǵan sıfr osydan eki aı buryn ǵana álemdik premerasy ótken «Dambo» kınokartınasynyń tabysynan eki ese asyp túsedi. Kompanııa atap ótkendeı, bul – orys jáne qazaq tilinde prokatta júrip jatqan fılmge qatysýdyń eń jaqsy kórsetkishi.
Demek, budan «Bolashaq» korporatıvtik qorynyń «О́zińnen basta» jobasy aıasynda qolǵa alynǵan álemdik úzdik fılmderdi qazaq tiline aýdarý jáne dýblıajdaý isiniń búginde kórermen arasynda keń qoldaý tapqandyǵyna kóz jetkizýge bolady.
«Aladdın» kınomıýzıklimen qosa eseptegende 2011 jyldan beri atalǵan joba aıasynda barlyǵy 29 gollıvýdtyq kınokartına qazaq tiline aýdarylyp, dýblıajdalypty. Naqtyraq aıtsaq, «Walt Disney Pictures»/ «Pixar» stýdııalarynyń 13 anımasııalyq fılmi jáne «Sony Pictures», «Disney», Lucasfilm Ltd. men Marvel Studios Inc. stýdııalarynyń otbasylyq kórsetilimge arnalǵan 16 fılmi ana tilinde sóıledi. Olardyń qatarynda «Tachkı-2»/«Kólikter 2», «Mstıtelı-2: Era Altrona»/ «Kek alýshylar: Altron dáýiri», «Hrabraıa serdse»/ «Batyl júrek», «Taına Koko»/ «Koko qupııasy», «Moana», «Malefısenta» jáne basqa týyndylar bar.
Atalǵan joba arqyly búginde otandyq 100-den astam akter «Walt Disney Pictures» daýystar qorynda tirkelgen. Onyń ishinde, ásirese, Qazaqstanǵa dýblıaj boıynsha halyqaralyq tanymaldyq ákelgen eń alǵashqy anımasııalyq fılm – «Tachkı 2»/«Kólikter 2» jobasynda Metr rólin dybystaǵan akter Azamat Qanapııa daýsynyń álemdegi eń úzdik daýys dep tanylýyn aıryqsha atap ótýge bolady. Sonymen qatar Azamat bes jyl boıy akter Ýıl Smıttiń daýysyn dybystaý quqyǵyna ıe boldy.
Osy tusta atap óter taǵy bir mańyzdy derek – qazaq tili dýblıajda túrik tilinen keıingi ekinshi túrki tiline aınaldy jáne «Walt Disney» kompanııasynyń tarıhynda 39-shy, al «Sony Pictures» stýdııasy reıtınginde 7-shi oryn tuǵyryna kóterildi. Sondaı-aq Shyǵys Eýropa men TMD elderine arnap shyǵarylatyn Blu-Ray-de tamashalaýǵa qoljetimdi gollıvýdtyq fılmderdiń alǵashqy jetiligine de enip úlgerdi. Bul – qazaq dýblıajy men akterleri úshin úlken jetistik ekeni sózsiz.
