[caption id="attachment_50927" align="aligncenter" width="560"] Foto: Ánýar Abdrahmanov[/caption]
Erteń Vılnıýs qalasynda fýtboldan Chempıondar lıgasynyń ekinshi irikteý kezeńinde Lıtvanyń «Jalgırıs» klýby men «Astana» komandasy kezdesedi. Osy oıynnyń aldynda lıtvalyq komandanyń bas jattyqtyrýshysy Valdas Dambraýskas qazaqstandyq jýrnalısterge aldaǵy match týraly aıtyp berdi. Bul týraly "Astana" fýtbol klýbynyń baspasóz qyzmeti habarlady.
— Aldaǵy oıynnan ne kútesiz?
— Árıne, eýropalyq jarystardy ulttyq chempıonattarmen salystyrýǵa bolmaıdy. Ekeýiniń deńgeıi basqa. «Astana» týraly aıtatyn bolsam, bul komandaǵa biz qurmetpen qaraımyz. Sizderdiń komandalaryńyz myqty. Byltyr Eýropa alańdarynda jaqsy oınady. Al qazir Qazaqstan chempıonatynyń kósh basynda keledi. «Astana» aldaǵy machtyń favorıti. Árıne, biz qol qýsyryp otyrmaımyz. Sońyna deıin oınaımyz. Bárin oıyn kórsetedi.
— «Astananyń» bas jattyqtyrýshysy Stanımır Stoılov týraly ne aıtasyz?
— Ol myqty maman dep estigenmin. Jattyqtyrýshy týraly onyń komandasynyń nátıjesi ǵana aıta alady. Qazaqstanda ol úlken jetistikterge jetti.
— Jaqynda «Jalgırıs» Groznyıdyń «Terek» klýbymen oınady. Osy matchta oıynshylaryńyz bir-birin túsinbeı oınaǵan sııaqty.
— Bizde oıynshylardyń barlyǵy kez-kelgen ýaqytta alańǵa shyǵyp, oınaı alady. Osyny olar Slovenııada ótken oqý-jattyǵý jıynynda kórsetti. «Terekpen» joldastyq kezdesý ótkizdik. Jattyǵýlardan keıin árıne, oıynshylar sharshaıdy. Al sársenbi kúni sizder basqa komandany kóresizder.
— Qazaqstanda Lıtvanyń kóptegen oıynshylary oınady. Mysaly, Artýras Jýlpa men Gedımınas Vıchýs. Siz olarmen sóılestińiz be?
— Jýlpa «Jalgırıste» oınaǵan. Qazaqstanda oınaǵan taǵy birneshe fýtbolısti bilemin. Olar – fýtbolıster. Olar tek óz komandalary týraly ǵana aıta alady.
— «Jalgırıs» toptyq týrnırge shyǵa al ma? Álde ol múmkin emes pe?
— Árbir oıynǵa jaqsy daıyndalý kerek. Eger bir kezeńnen ótseń, kelesiden ótsem dep armandaısyn. Birinshi qadam jasaý qıyn. Bizdiń oıynshylar budan da úlken jetistikke jetetinimizge senimdi. Olar Eýropa jarystaryna jıi qatysady. Ulttyq quramada oınaıdy. Bári tájirıbeli oıynshylar. Lıtvandar Eýropanyń kók maısa alańdarynda ózderin jaqsy qyrynan kórsete alady. Maǵan senseńiz bolady.
— Aldaǵy machta stadıon tolyq bolady dep oılaısyz ba?
— Solaı bolatynyna úmittenemin. Byltyr Shvesııanyń «Malme» klýbymen oınaǵanda trıbýnada ıne shanshar oryn bolǵan joq. Biz jergilikti jankúıerlerdiń qoldaýyn kútemiz. Qoldaý árqashan kerek.
Erteń, 13 shildede saǵat 23.00-de "Qazaqstan" telearnasy «Jalgırıs» pen «Astana» komandalarynyń kezdesýin tikeleı efırde kórsetedi.
Dastan KENJALIN
[caption id="attachment_50928" align="aligncenter" width="560"] Foto: Ánýar Abdrahmanov[/caption]