El mereıi ósken kún

[caption id="attachment_55742" align="alignleft" width="560"] Rio2016_AO[/caption] Dúbirli dodaǵa úkilep qosqan úmitkerimiz jahan ja­ma­ǵaty aldynda abyroıy­myz­dy asqaqtatyp, baıraǵy­myzdy bıikke kóterdi. Osylaısha, burnaǵy kúngi tún Qazaq­stan sportynyń aspanynda naǵyz jaýhar juldyzdar ja­myraǵan, qazaq kóginen shuǵa jaýǵan shuǵylaly shaq bol­dy. Buǵan deıin 1 kúmis, 3 qola medaldy dátke qýat, kóńil­ge medet etip kelgen olım­pıadashylarymyz bir kún­niń alty saǵaty aınala­synda 2 altyn, 1 kúmis me­daldy jeńip alyp, aıdy as­pannan bir-aq shyǵardy. Atap aıtqanda, aýyr atlet Nıd­jat Rahımov pen júzýshi Dmıt­rıı Balandın altyn júl­dege qol jetkizse, taǵy bir ziltemirshi qyzymyz Jadyra Japparqul kúmis medaldy moınyna taqty. Osylaısha, Dıma sýda júzý sportynan Qazaqstanǵa Olımpıadanyń tuńǵysh altyn medalin alyp berse, Jazıra qazaq aýyr atletteri arasynda birinshi bolyp Oıyndardyń tuǵyryna kóterildi. Budan 4 jyl buryn bir kúnde eki birdeı altyn medalǵa qol jetkizgen kezimiz bolyp edi, biraq olardyń shylaýynda búgingideı kúmis júlde júrgen joq-tyn. Ne degende de keremet je­tistik! Qalǵan sportshyla­rymyzdy jeńiske jigerlen­dire túsetin baǵaly basta­ma! Al aldaǵy saıystar men olarda atoı sala­tyn saıyp­qyran­dardyń múmkindikterin bezben basyna salyp kórgen­de, áli alatyn súbemiz ben sa­latyn oljamyz qatary bar­shylyq ekenin paıymdaı túskendeı bolamyz. Tek Ja­ratqan ıemiz qyrsyǵynan saqtap, báriniń sáttiligin ber­geı. Bul kúni Rıoǵa qarap kóz tigip, qulaq túrip otyrǵan aǵaıyndarymyzdy eleń etkizgen taǵy bir qýanyshty oqıǵa oryn aldy. Bul marapattardyń syrtynda 91 kıloǵa deıingi salmaqtaǵy boksshymyz Vasılıı Levıt shırek fınalda mavrıkııalyq qarsylasy Djeıms Kennedı St. Pıerreni 3:0 etip utyp, medaldar úlestiretin jartylaı fınalǵa ótti. Osydan keıin keminde qola medaldyń ıegeri bolǵaly turǵan ol fınalǵa shyǵý úshin kýbalyq Erıslandı Savonmen shaıqasqa túsedi. О́kinishke qaraı, jarystyń osy kezeńi úshin sol kúni túnniń jarymynda sharshy alańǵa shyqqan 48 kg salmaqtaǵy 32 jastaǵy bylǵary qolǵap sheberimiz Birjan Jaqypov ózinen 9 jas kishi ózbekstandyq qarsylasy Hasanboı Dýsmatovqa qarsy eshqandaı qaırat kórsete almaı, jarys jolynan shyǵyp qaldy. Keshe túnde bizdiń sańlaq­tarymyz sporttyń 3 túri boıynsha jarys joldaryna shyqty. Solardyń arasynda dzıýdodan 100 kıloǵa deıingi salmaqta tatamıge kóterilip, Oıyndardyń júldesi úshin talasady dep kútip otyrǵan Maksım Rakov ta bar. Budan bólek, Elızaveta Korol úsh túrli sıpattan vıntovkamen nysana kózdeý saıysyna qatysty. Bulardan bólek, 4 boksshymyz rıng tórine shyǵyp, medaldar aýylyna aparatyn soqpaq súrleýine túsý jolynda kúsh synasty. Atap aıtqanda, Qaırat Erálıev (56 kg) pen Abylaıhan Júsipov (64 kg) 1/16 fınaldyq jekpe-jekterin, Danııar Eleýsinov (69 kg) pen Ádilbek Nııazymbetov 1/8 fınaldyq urystaryn ótkizdi. Osy gazet qoldaryńyzǵa tıgen kezde bárińizge bulardyń nátıjeleri de belgili bolyp turady. Sondyqtan, atalǵan bylǵary qolǵap sheberleriniń báriniń osy synaqtan abyroımen asýlaryn tileımiz. Qazan aýzy joǵary!