Ortekedeı orǵyǵan jeńil atlet Olga Rypakova Olımpıadanyń taǵy bir júldesin enshiledi. Rıo Olımpıadasynyń qola júldegeri atanǵan Olga Rypakovanyń jeńisimen quttyqtap, О́skemende turatyn otbasyna qońyraý shalǵan edik. Ákesi men kúıeýi Olımpıada oıyndaryna birge attanǵandyqtan, týǵan sińlisi Lıýdmıla Alekssevamen sóılesýdiń sáti tústi.
– Lıýda, salamatsyz ba? Olganyń qola júldesi qutty bolsyn!
– Rahmet!
– Olga Rıo Olımpıadasyna qandaı senimmen attandy? Qaı tuǵyrdan kórinetinin aldyn ala bildi me?
– Olıa qaı mejeden kórinetinin bilmese de, júldeger bolatynyn, medal alatynyn anyq bildi. О́ıtkeni, Olımpıadaǵa jaqsy kóńil-kúımen, tas-túıin attandy. Árıne, sportshynyń barlyǵy altynǵa umtylady. Olga bul joly «qolaǵa» ıe boldy. О́te qýanyshtymyn. Negizi, bul suraqty elge kelgeninde jattyqtyrýshysyna qoıýlaryńyz kerek shyǵar.
– Jattyqtyrýshysy ákesi ekenin bilemiz. Úıde qandaı da bir boljamdar bolǵan shyǵar?
– Iá, Olganyń bapkeri týǵan ákesi – Sergeı Dmıtrıevıch Alekseev. Úıde boljamdar boldy ma, bilmeımin, esimde joq. Negizi, naqty boljamǵa arqa súıegen joqpyz. Altyn alamyz dep te aıtpadyq. Júldeni oılaýǵa tyrysqan joqpyz. Árıne, jan-dúnıemizde úmit sáýlesi boldy. Úmit únemi bolýy kerek. Biraq «altyn» bolady dep talqylaǵan emespiz. Ákemiz boljam jasaǵandy unatpaıdy. Ol tek jumys isteıdi. Boljam jasaý durys dúnıe emes. О́ıtkeni, sportty boljaý múmkin de emes. Daıyndaldyń, altyn alasyń deýge bolmaıdy.
– «Qolany» qomsynǵan joqsyzdar ma?
– Men rızamyn. Olga joǵary deńgeıde óner kórsetti. Qarsylastary da óte myqty boldy. Nege «altyn medal almady» degenge kelsek, bul Olganyń qateligi emes. Ol ózine júktelgen barlyq mindetti jaqsy atqardy. Básekeni kórgende, ásirese fınalǵa kelgende, qarsylastarynyń óte qýatty ekenin baıqadyq, sondyqtan qatty qobaljý boldy. Biraq túptep kelgende Olga úshtikke endi. Et jaqyndaryna Rıo Olımpıadasy London Olımpıadasynan kem soqqan joq. Sózsiz qýanyshtymyz. Bul óte kúrdeli kúrespen kelgen medal! Olganyń Londonnan keıingi úzilisin esepke alǵanda, bul júldeniń bási bıik ekeni daýsyz. Búginde Olga eki bala tárbıelep otyr. Londonnan keıin otbasyna da kóńil bóldi, jattyǵýǵa da ýaqyt tapty. Jáne jattyǵýyn oıdaǵydaı atqardy. Onyń nátıjesin Rıo tórinen kórdińizder.
– Olımpıada qalashyǵynda Olganyń et jaqyndarynan kimder boldy?
– Jattyqtyrýshy retinde ákesi Sergeı Dmıtrıevıch Alekseev birge barǵanyn aıttym. Kúıeýi Denıs Sergeevıch Rypakov ta jattyqtyrýshy retinde janynda boldy.
– Olganyń ónerin qaıda kórdińizder?
– Teledıdardan tikeleı kórsetilim tańerteń erte bolǵandyqtan, úıde bárimiz birge tamashaladyq. Anamyz, men, Olıanyń kishi uly bar, úsheýmiz kórdik. Qatty qobaljydyq ta, qýandyq ta. Bul tamasha nátıje boldy. Qatarynan Olımpıada medaldaryn enshileý degenińiz!.. О́te ǵajap dúnıe ǵoı! Álbette, Olga óziniń daıyndyǵyna sendi. Tipti qarsylastary týraly, olardyń nátıjeleri jóninde de oılamaıdy. О́ziniń kóńil-kúıi men barlyq oı júıesin qımyly men sekirýine arnaıdy. Osylaı bolǵanyna sendik. Aqtyq básekede aldyńǵy nátıjeleri sál kemshindeý bolǵandyqtan, qatty ýaıymdadyq. О́ziniń joǵary upaıyn enshilep, qola medal alatyny belgili bolǵanda ǵana ıyǵymyzdan júk túskendeı, tynysymyz keńip sala berdi. Jyladyq deı almaımyn. Anam qýanǵannan kúle berdi. Bárimiz qýandyq. О́ıtkeni, Olga Olımpıada tuǵyrynda qaldy. Bizge arada sekýndtar ótpeı jatyp, quttyqtaǵan qońyraýlar men sms-ter kele bastady. Keıbireýler taǵy da sekire me dep surap jatty. Aǵaıyndar men dostardyń barlyǵy jankúıer bolyp, qoldaý kórsetti.
– Siz Olgaǵa qalaı týysasyz? Ol kishkentaı kezinde qandaı boldy?
– Men Olganyń týǵan sińlisimin. Úıde ekeýmiz óstik. Ákemiz – jeńil atletıkadan balalardy jattyqtyratyn. Bastapqyda Olgany úıde jalǵyz qaldyrmaý úshin ózimen birge jattyǵý zalyna ertip aparyp júrdi. Olgany jattyǵyp jatqan balalardyń arasyna qosyp qoıatyn. Ol alǵashqyda osylaısha kópshilikpen birge júgirip, sekirip júrdi. Ata-anamyz 9 jasynda júıeli túrde aınalysýǵa jeńil atletıkaǵa berdi. Ol óz qatarlastarynyń arasynan sýyrylyp shyqty. Osylaısha 15 jasynan bastap kásibı túrde shuǵyldanýǵa den qoıdy. 2007 jyldardyń shamasynda jeńil atletıkanyń osy túrine bet burdy.
– Siz de sportshysyz ba?
– Joq. Densaýlyǵym kelmeıtindikten, sportpen shuǵyldanǵan emespin.
[caption id="attachment_56706" align="aligncenter" width="560"] SONY DSC[/caption]
– Olgaǵa sporttyq daryn áke jaǵynan keldi me, álde sheshesi de bul salaǵa beıim be?
– Ákemiz sportpen shuǵyldanǵanyn, sportshylardy tárbıelegenin aıttym. Anamyzdyń tabıǵatynda da sporttyq minez-qulyq bar. Eń aldymen adamnyń tabıǵatynda qabilet bolýy tıis. Sonan soń sporttyq sapa, tózimdilik, shydamdylyq, jeńiske qushtarlyq syndy qasıetterdi meńgerý úshin tastaı tártip kerek. Tártip bolmasa, talantty qajetti maqsatqa jumsaı almaýyń múmkin. Mine, Olgadan osynyń barlyǵy tabyldy. Ol kerek kezde óziniń barsha qabilet-qýatyn bir maqsatqa jumyldyra alady. Sportta da, ómirde de óte jaýapty. Osy qasıeti Olgany alǵa jetelep keledi.
– Olgamen Rıo Olımpıadasyndaǵy qola júldesinen keıin sóılese aldyńyzdar ma?
– Joq, áli sóılese alǵan joqpyz. Olga jarystan keıin dopıngtik baqylaýdan ótip jatyr. Olımpıada baǵdarlamasynan áli bosaǵan joq. Men oǵan sms-habarlama jazyp jiberdim. Biraq áli jaýap kelmedi. Jeke dárigerimen sóıleskenimde, ápkemniń óte joǵary kóńil-kúıde, qýanyshty, jaǵdaıy jaqsy ekenin jetkizdi. Otandastaryna ystyq sálem joldap jatqanyn aıtty.
– Áńgimeńizge rahmet! Olımpıada júldesimen taǵy da quttyqtaımyz!
Suhbattasqan Dýman ANASh.