Shyǵys óńiriniń sáýlettik-etnografııalyq jáne tabıǵı-landshaftty mýzeı-qoryǵynda aq tústi taýys paıda boldy. Qardaı appaq qustyń qos juby – jergilikti faýnanyń ókilderi. Iаǵnı, mýzeı-qoryqtyń haıýanattar baǵyndaǵy kádýilgi túrli-tústi qanatty taýystyń mekıeni basqan jumyrtqany jaryp shyqqan.
«Bular kópshilik oılaǵandaı albınostar emes, taýys tuqymdastardyń jekelegen genetıkalyq jelisi. О́te sırek kezdesetindikten, Shyǵys elderi men Aýǵanstanda asa qymbatqa baǵalanady. О́ıtkeni, aq tús – tazalyq pen adaldyqtyń belgisi ispetti», – dedi qoryq-mýzeıdiń faýna bóliminiń meńgerýshisi Zaınıtdın Shamshıev.
Búginde taýystyń erekshe tústi eki balapany da birshama ósip, tordaǵy ózderiniń kógildir qanatty týystarynyń qasyna jiberildi. Bir qyzyǵy, qustardyń qaýyrsyndarynyń túsi bolmasa, basqa aıyrmashylyǵy joq. Sondaı-aq aq taýystardyń tábeti jaqsy, ár nársege áýes ekeni baıqaldy. Mamandardyń aıtýynsha, bul qustardyń minez-qulqy dástúrli totydaıyn taranǵan týystaryna qaraǵanda bııazy jáne jańa ortaǵa tez beıimdelip ketedi eken. Aıtpaqshy, qazaqta «totydaıyn taranǵan, suńqardaıyn sylanǵan» degen óleń joldary erteden aıtylady. Osyndaǵy totymyz – taýys. Babalarymyz qyrǵaýyl tektes taýystyń ádemi qaýyrsyndaryn jaıyp jiberetinine qarap aıtqan sııaqty. Al biz popýgaı men sýbtropıkalyq shymshyqtardy toty qus dep qatelesip júrmiz...
Dýman ANASh