Bul túni qala turǵyndary Rıo-de-Janeırodan kele jatqan qos juldyzdy – kúmis júldeger Eldos Smetov pen qola júldeger Otgonseseg Galbadrahty qarsy alýǵa shyqty. Onsyz da túnniń bul mezgilinde qurlyqtyń arǵy betindegi Brazılııaǵa qulaq túrip, qus uıqyly júrgen jankúıerler qos sportshyny kórgende qol shapalaqtap, búkil áýejaıdy beınebir olardy saıystyń jeńisti sátinde kórgendeı dýmandatyp jiberdi.
Eldostyń ákesi Baqtybaı Smetov bylaı dedi:
– Bizdiń qýanyshymyzda shek joq. Eldos 6 jasynan bastap sportpen úzbeı aınalysyp keledi. Tókken tórdiń, etken eńbektiń zaıa ketpeıtinine kózim jetti. Balamnyń aýzynan Olımpıada túspeı armandap júrýshi edi, ol maqsatyna jetti. Sportpen aınalysyńdar, jastar!
Otgonseseg te qazaqshadan quralaqan emes eken. Qarsy alýshy topqa qarap turyp, qazaq tilinde alystaǵy Qazaqstannan qoldaý kórsetken jankúıerlerge rahmet aıtty. О́zi armanyna jetkenine qýanyshty eken. Sózin kibirtiktep aıaqtap, uıań ǵana jymıǵan buldyryqtaı mońǵol qyzy oń qolyn joǵary kóterip jastarǵa dem bere: «Alǵa, Qazaqstan!», – dedi.
Alataýdyń ıyǵynan altyn shapaq asyp túskende áýejaıǵa Olımpıadanyń «altynyn tıegen» ekinshi bir erekshe ushaq kelip qondy. Bul Almatynyń «altyn balasy» – bıylǵy Olımpıadanyń chempıony, balyqsha júze biletin sheber Dmıtrıı Balandın mingen laıner bolatyn.
Sýdaı jańa chempıondy qala jurtshylyǵy, ózi oqıtyn ál-Farabı atyndaǵy Qaz MUÝ stýdentteri, jaqyndary jáne qala ákimi Baýyrjan Baıbek qarsy aldy.
– Dmıtrıı Balandınniń Rıoda ótip jatqan jazǵy Olımpıada oıyndaryndaǵy jeńisi – bizdiń el úshin tarıhı jeńis, – dedi qala basshysy. – Biz búkil el bolyp bul jeńiske erekshe qýandyq. Ol bul jarysqa jyldar boıy ter tógip daıyndaldy. Sóıtip, ádil túrde shyn jeńimpaz atandy. Aldaǵy ýaqytta elimizde Dmıtrıı Balandın sekildi jastar kóptep shyǵyp, chempıon atanyp, elimizdiń abyroıyn arttyrady degen senimdemin.
О́z kezeginde Almatynyń «altyn» balasy ózine qoldaý bildirgen jankúıerlerine alǵysyn bildirdi. «Men úshin elimizdi álemge tanytý, kók Týdy jelbiretý zor mártebe!..» dedi ol.
Jankúıerler Olımpıada chempıonymen sýretke tústi, qoltańba alýǵa kezekke turdy.
Talǵat SÚIINBAI,
«Egemen Qazaqstan»
ALMATY