Halyqaralyq baıqaýda ekinshi oryn ıelendi

Reseıdiń Alabıno polıgonynda «Armııa halyqaralyq oıyndary-2016» aıaqtaldy. Qazaqstan Qarýly Kúshteriniń quramasy saıystardy tabysty aıaqtady. Bizdiń áskerı qyzmetshiler Azııa, Eýropa, Afrıka jáne Latyn Amerıka­synyń 19 memleketinen kelgen 120 armııalyq komandanyń arasynda jalpykomandalyq ekinshi oryndy ıelendi. Birinshi orynǵa Reseı komandasy shyqsa, úshinshi júldege Qytaı quramasy ıe boldy. Bizdiń komanda birden-bir ókildi komanda dep tanyldy. Atap aıtqanda, oıyndarǵa qatysý sany jaǵynan saıys­ty uıymdastyrýshy komanda men Qytaı komandasynan keıin turdy. Qazaqstandyq áskerıler 23 baıqaýdyń 21-ine qatysty. Bul aýqymdy qatysý Qazaqstan armııasynyń jańa múmkindikterin kórsetti. Qazaqstannyń Qorǵanys mı­nıstri Imanǵalı Tasmaǵambetov atap ótkendeı, bıylǵy jyly «Ar­mııa halyqaralyq oıyndary» ózi­niń mazmuny men aýqymdylyǵy jaǵynan erekshelenip, halyqaralyq yntymaqtastyqtyń jańa sımvolyna aınaldy. Tájirıbe almasý, beıbitshilik pen kelisimniń kepili retinde tanyldy. Qazaqstan oıyn­darǵa qarapaıym saıys retinde ǵana qaramaıdy, sonymen qatar, jarys jaýyngerlik baýyrmaldyq rýhyn kóteredi dep sanaıdy. Reseıdiń barlyq aımaǵyn­daǵy 19 áskerı polıgonda qurlyq­ta, teńizde jáne áýede Qazaqstan Qarýly Kúshteriniń namysyn 600 áskerı qyzmetshi qorǵady. Áskerı ushqyshtar, teńizshiler, desantshylar, júrgizýshiler, tankıster men ınjenerler, kınologtar, ás­kerı dárigerler jáne aspazshy­lar – barlyǵy halyqara­lyq dáre­­­je­degi bizdiń áskerimizdiń aı­­by­nyn asyrý úshin kúresti. On­daǵan saǵattar jattyǵýlarda ótip, júzdegen qashyqtyqtar men keder­gi­lerdi eńserdi. Nátıjesinde jalpy­komandalyq ekinshi oryn júldesimen «Teńiz kýbogynda» áskerı teńizshiler, «Senimdi dos» baıqaýynda kınologtar, «Desantty vzvod» jáne «Injenerlik formýla» baıqaýlarynda tıisinshe desantshylar men ınjenerler jeńimpazdar retinde elge oraldy. Sondaı-aq, «Tank bıatlony», «Elbrýstik sheńber», «Rembat», «Qarý sheberi», «Dala ashanasy» jáne «Avtobronetankti tehnıka sheberi» baıqaýlarynda júldeli úshinshi oryndy jeńip aldy. Atalǵan oıyndardyń jarqyn sátteriniń biri – jeke esepte al­dyńǵy orynǵa shyǵyp, 699 ball jınaǵan qazaqstandyq áskerı qyz­metshi Baýyrjan Muqyshev úzdik kınolog dep tanyldy. «Sývorov tegeýrini» baı­qaýy bizdiń komanda úshin jeńisti boldy. Quramynda jaýyngerlik mashı­na komandıri aǵa leıtenant Marat Maýenov, operator-baǵdarlaýshy serjant Jaqsylyq Eskendirov, mehanık-júrgizýshi serjant Sáttibek Bekbaýlın bar komanda eń úzdik dep tanyldy. Qazaqstan úshin «Armııa oıyndary-2016» baıqaýynyń taǵy bir ereksheligi – alǵash ret «Artıl­lerııalyq atý sheberi» jáne «Mergen shebi» eki baıqaýy bizdiń jerimizde ótti. 12 memlekettiń úzdik mergenderi men artıllerııa­shylary jeńis úshin saıysty. Baıqaýdyń alǵashqy kezeńderi túngi jaǵdaıda ótti. Atystardy elimizde shyǵarylǵan túngi kórý quraldary qoldanyldy. Bul Qazaqstan jerindegi Armııa oıyndary tarıhynyń basy ǵana sanalady. Kelesi jyly bizdiń áskerı polıgondar taǵy da áskerı mamandar saıysynyń ortalyǵyna aınalady. Endi bizde eki emes, bes saıys ótkiziledi. Armııa oıyndary­nyń baǵdarlamasyna brondy avto­mashınalardyń saıysy, áskerı qyzmetshi qyz-kelinshekterge ar­nalǵan saıys, basqarýsyz ushaq­tardyń qatysýymen baıqaýlar qosy­lady. Sondaı-aq, bıyl elimizde ótken  «Artıllerııalyq atý sheberi» jáne «Mergen shebi» baıqaýlary uıymdastyrylady. Sáýlebek BIRJAN