«Uly Dala ulaǵattary» – Elbasymyz Nursultan Nazarbaev jazǵan jańa eńbek – oqyǵan adamdy enjar qaldyrmaıtyn, týǵan elimiz – Qazaqstannyń sonaý-sonaý erteden kele jatqan myńdaǵan jyldyq tarıhyna, ótkeni men búgingisine oı júgirtken, keýdeni qýanyshqa, shattyqqa, maqtanysh sezimine bóleıtin dúnıe eken. Ony oqyp otyrǵanda keshe qandaı edik, búgin qandaımyz degen oı ózinen ózi týyndaıdy. Bul týyndy – osydan shırek ǵasyr buryn táýelsizdikke qol jetkizgen elimizdi sol kezdegi barlyq qıyndyqtardan qutqaryp, ekonomıkamyzdy nyǵaıtyp, halyqtyń ál-aýqatyn jaqsartyp, damýdyń dańǵyl jolyna túsirip, kóregendikpen, kemeńgerlikpen sáýleli erteńimizge, jarqyn bolashaqqa qaraı bastap kele jatqan Elbasymyzdyń óz halqymen syrlasýy, atqarylǵan ister, qol jetkizgen jetistikterimiz, jeńisterimiz jóninde týǵan halqyna bergen esebi dese de bolǵandaı eken.
Maǵan keıde oı keledi: eger sonaý ótken ǵasyrdyń toqsanynshy jyldarynyń basynda el tizgini elimizdiń baǵyna týǵan Nursultan Ábishulynyń emes, basqa bireýdiń qolyna tıse, jaǵdaıymyz qalaı bolar edi degen. Oılaýdyń ózi qorqynyshty. Aǵa urpaq ókilderi bizder jaqsy bilemiz, ol kezdegi Qazaqstannyń hal-ahýaly adam aıarlyqtaı qıyn edi. El ekonomıkasy negizinen shıkizat óndirýge baǵyttalǵan. Odaq ydyrap, taraǵan soń burynǵy sharýashylyq baılanystardyń barlyǵy kúrt úzilip, óndiris te, ózge tirshiligimiz de turalap, turyp qaldy. Eldi jumyssyzdyq, qıynshylyq jaılady. Bizden góri jaǵdaılary turaqty bolyp sanalatyn ózge respýblıkalardyń ózinde ultarazdaq kıkiljińder, qaqtyǵystar týyndap jatqanda, kóp ultty, onyń ústine jer ıesi – qazaq halqynan syrttan kelgen ózge ulttardyń sany áldeqaıda basym Qazaqstan óz aldyna memleket bolyp kete almaıdy dep sáýegeılik aıtýshylar da boldy. Shúkir-shúkir… Elbasynyń óziniń sózimen aıtsaq: «El bolýdyń, memleket bolýdyń jón-jobasyn kórsetip bergen, kómekke kelgen eshkim bolǵan joq. Biz bárin de tyńnan bastap, halqymyzben birge qalyptastyrdyq. Joqtan bar jasadyq, bardy berekege aınaldyrdyq, sol yrysty ósý men órkendeýdiń negizi etip aldyq». Sóıtip, búgingideı álem tanyǵan, eń úlken, alyp memleketterdiń ózi qurmetpen qaraıtyn, maqtanysh tutýǵa bolatyn Qazaqstan dárejesine jettik.
Bul kitapta elimizdiń osyndaı ósý joly tamasha baıandalǵan.