Elordadaǵy «Tilep» qobyz saraıynda Astana qalasy Tilderdi damytý basqarmasynyń uıymdastyrýymen el Táýelsizdiginiń 25 jyldyǵyna arnalǵan «Máńgilik El – muratym» atty jas aqyndar músháırasy men «Azattyq úni» degen taqyrypta jyrshy-termeshiler baıqaýy ótti.
Shart boıynsha músháıra men baıqaýǵa 16-30 jas aralyǵyndaǵy úmitkerler qatysty. «Tilep» qobyz saraıynda ótken keshke sol úmitkerler arasynan tańdap alynyp, aldyn ala iriktelgen jastar táýelsizdikke arnalǵan jáne erkin taqyryptaǵy óleńderin oqyp, jyr-termelerin oryndady. Shara barysynda músháıra men baıqaýdyń qorytyndysy qatar jarııalandy. Sonymen, jas aqyndardyń músháırasynyń qorytyndysy boıynsha birinshi oryn Juldyzaı Ysqaqtyń, ekinshi oryn Sulýjan Tabyldy jáne Eldos Ánkeı esimdi jastardyń enshisine buıyrsa, úshinshi orynǵa Tilen Tobyqbaı men Bekmurat О́mirbek laıyqty dep tanyldy. Al jyrshy-termeshiler baıqaýynda birinshi oryndy Nurbek Sansyzbaev, ekinshi oryndy Ferýza Ońtalap, úshinshi oryndy Rahat Bekasylov jeńip aldy.
Aıta keteıik, jyr dodasynyń qazylar alqasynyń quramynda belgili ádebıetshi Ilııas Rysbekuly, «Shabyt» halyqaralyq jastar festıvaliniń laýreaty, aqyn Asylzat Arystanbek jáne «Daryn» jastar syılyǵynyń laýreaty, aqyn Qalqaman Sarın boldy. Sondaı-aq, jyraý, professor Amandyq Kómekuly, Mádenıet qaıratkeri, belgili ánshi Klara Tólenbaeva jáne aqyn, «Abaıtaný» ortalyǵynyń dırektory Almahan Muhametqalıqyzy jyrshy-termeshiler baıqaýyna qazylyq etti.
Aıgúl SEIILOVA,
«Egemen Qazaqstan»